Piiaavinnik suliniutit pingasut tuluit piiaanermik ingerlatseqatigiiffiata pisiarai
![](/sites/default/files/styles/image_934x467/public/article_images/guld_fra_guldmine_i_canada_foto_mike_beauregard_flickr.jpg?itok=9YfdFcTt)
Piaanermik ingerlatseqatigiiffiup FinnAustip piiaanermik ingerlatseqatigiiffimmik Avannaa Exploration Limitedimik, suliniutaanillu pingasuusunik taakkununngalu atatillugu Pituffimmi, Kangerluarsummi, Qeqertarsuarmi Nuussuarmilu akuersissutaanik pisinissaa Naalakkersuisunit akuerineqarpoq.
Tamatumunnga peqatigitillugu FinnAustip Qeqertarsuarmut Nuussuarmullu akuersissutaa kvadratkilometerinik 28-nik ilaneqarpoq.
Avannaa Exploration Limitedip Nunatsinni suliaqarnini annikillisaleruttoraluarpaa, taamaammat FinnAustip piianermik suliniutinik nangitsinissaminik soqutiginninnera pitsaasuusoq, Aatsitassanut naalakkersuisoqarfimmi pisortap, Jørgen Hammeken-Holmip, KNR-imut oqaatigaa.
FinnAustip Pituffimmi titaniummimik piiaavik peqataaffigilluareerpaa, ingerlatseqatigiiffimmilu pisortaaneq Roderick McIllree naapertorlugu nunap ilaani nukittunerusumik inissisimalerneq iluarisimaarneqarpoq, ingerlatseqatigiiffiup nittartagaatigut nalunaaruteqarluni taama allappoq.