Piareersarnermi ilinniarnermusiat peerniarpai
![](/sites/default/files/styles/image_934x467/public/article_images/palle_christiansen_foto_nordenorg630_6.jpg?itok=YBBq9i6b)
Piareersarfimmut taarsiullugu inuussutissarsiutinut ilinniarfinnut ilinnialernissamut ukiumi ataatsimik sivisussusilimmik pikkorissaqqaartalernissaq siunniusimaneqarpoq.
- Taamaattoqalerpat ilinniartup ilinniaqqinnissaanut piffissaq atortagaa sivikillineqarsinnaavoq, ilinniarniagaanullu tulluuttumik pikkorissarneqartalissalluni, Palle Christiansenip ilinniartitaanermut suleriusissaq nutaaq ualeru saqqummiussassamini taama oqaaseqarpoq.
GU-mulli ilinniaqqiniaraanni sunngiffimmi atuarfinni pikkorissartoqaqqissinnaanera Palle Christiansenip siunnersuutigaa.
Taamaattoqalissangaluarpat pikkorissarnerup nalaani ilinniagaqarnersiuteqartarneq atorunnaassaaq, tassalu millionilikkaanik sipaartoqarsinnaanngussaaq, taama ilinniartitaanermut suleriusissami nutaami allassimavoq.
Tassa ilinniartunut ataasiakkaanut siunnersuineq suleriusissanullu pilersaarusiortalernissaa kisisisa Piareersarfiup aalluttalissavai.
Palle Christiansenilli isummersuutai Kommune Kujallermi Inuussutissarsiornermut Sulisoqarnermullu ataatsimiititaliami siulittaasup Kalistat Lundip iluarinngilai, GU-lernissarlu siunertaralugu pikkorissartarneq atorunnaarsinneqassappat ilinniagaqartut ikilinerannik kinguneqassasoralugu.
- Siunnersuut atuutsinneqalissangaluarpat inuusuttut isorliunerusuneersut ilinniaqqinnissaanut periarfissaat pisarissersorneqarneqassapput, tassami inuusuttut ilinniaqqinniartut faginut misilitsiffiusussanut atuarumasut Sunngiffimmi atuartitsitsinermi amigartalissapput allaallu ajornarluinnarsinerinik kinguneqarsinnaalluni, aamma 2010-miit 2011-mut Kommune Kujallermi Piareersarfinni ilinniartut 13-iugaangata qulingiluat GU-lernissartik siunertaralugu piareersarfinni ilinniartuusarput, Kalistat Lund taama paasissutissiivoq AEU-lu aqqutigalugu ilinniartarnerit atorunnaarsinneqarnissaasa kingunerinik ilinniartut uniinnartartut amerlinissaat ima siulittuutigalugu.
- Uuma siunnersuutip kingunerisaanik sivisunerusumik qitiusumik ilinniarfimmi atuartariaqalernermik kinguneqassaaq uniinnartartullu amerlanerulernerinik kinguneqarsinnaalluarluni, tassami inuusuttuaqqat sivisunerusumik ilaquttamik qimassimanerat sapilerlugu atuarnertik unitsiinnartaraat misissuinerit takutereerpaat, Kalistat Lund allappoq.
Ukioq atuarfiusumi 2010-mi 11-milu AEU aqqutigalugu Kommune Kujallermi ilinniartut 54-t naammassipput. Taakkunannga 21-t ilinniaqqilersimapput ilaalu ilinniaqqinnissaminnut ukioq manna qinnuteqarsimallutik.
Naalakersuisut paasissutissiinerat naapertorlugu inuusuttuaqqat 50 procentii meeqqat atuarfianiit naammassigaangata ingerlaqqinneq ajorput. Ingerlaqqinngitsoortartullu 2025-mi procentinut tallimaananarnut appartinneqarnissaa naalakkersuisut siunniussimavaat.
Nunatsinni Piareersarfiit illoqarfinni annerumaani tamani nunaqarfimmilu ataatsimi ullumikkut atuupput.