Piareersarfik pillugu Pallep pilersaarutaa amerlanerussuteqartut akerleraat
![](/sites/default/files/styles/image_934x467/public/article_images/studenter_630_7.jpg?itok=15DZONwC)
- Palle Christiansenip eqqaamassavaa, niuertutut aningaasanik sinneqartoorniarluta ingerlataqannginnatta inuiaqatigiinniliuna ingerlatsisuusugut, Inatsisartuni illuatungiliuttut siuttuat Aleqa Hammond Siumumeersoq oqarpoq.
- Pingaartorujussuuvoq meeqqat atuarfianni meerartatta ilinniartinneqarnerisa nukittuumik inissisimanissaa, taamaalilluni meeqqat atuarfiinit anisut, ilinniaqqiffinnut nukittullutik piareersimasutut misigisimanissaat qulakkissagatsigu, Siumup siulittaasua, Aleqa Hammond oqarpoq.
Inuusuttunut allanullu ataasiakkaanut Piareersarfik siunnersuisuusarnissamik suliaqarnerusalissasoq, Ilinniartitaanermut Naalakkersuisup, Palle Christiansenip piumasaraa, siunnersuutigalugu inuussutissarsiutinut ilinniarfiit namminneerlutik ilinniartut atorfissaqartitaannik siunnersuisarnissaq aallutissagaat.
Ilinniarnertuunngorniarfinni atualernissamut piukkunnarsarnerit, unnukkut atuartitsinerni ilinniarneqarsinnaasut Naalakkersuisup siunnersuutigaa. Siunnersuutigaluguttaaq Piareersarfittoqarnerani ilinniartuunersiat atorunnaarsinneqassasut.
Ukiuni makkunani Piareersarfiup, aatsaat taama atorfissaqartinneqaleruttornera unitsinnagu, Piareersarfik nukittorsarneqartariaqartoq, Siumut isumaqarpoq.
- Naalakkersuisut taama siunnerfeqarnerat isumaqatiginngilarput. Inuiaqatigiinni Piareersarfiit pilersinneqarnerat peqquteqarmat meeqqat atuarfianniit naammassisimallutik ingerlariaqqissinnaanissaminnut ilisimasamikkut amigaatillit aammalu ikiorserneqartariaqartut immikkut isigalugit nukittorsarneqarnissaallu siunertaammat, Aleqa Hammond oqarpoq.
Inuusuttut ukiuni aalajangersimasuni inunngortut affaat, meeqqat atuarfianniit qaffasinnerusunut ilinniarfinnut ingerlaqqinneq ajortut Naalakkersuisut oqaatigaat.
Tamannarpiaq pillugu Inuit Ataqatigiit oqarput, Ilinniartitaanermut Naalakkersuisup siunnersuutaa atuutsinneqalissagaluarpat, inuusuttut katataasut amerlanerulersiinnarneqassasut.
- Inuit Ataqatigiinniit isumaqarpugut, Piareersarfiit ilinniaqqinnissamut piukkunnarsarfittut atorluarneqarsinnaasut, imatullu atortariaqarlutik ilinnialernermut ammaassisuullutik, Inuit Ataqatigiit oqaaseqartartuat, Hans Aronsen ippassaq saqqummiussinermini taama ilaatigut oqarpoq.
Inuit Ataqatigiit aamma isumaqarput, sulinermut ilinniarfiit qaffassaanissaq suliassarinngikkaat aammalu taakku pisinnaatitaanngitsut soorlu kalaallisut, qallunaatut, tuluttut aamma matematikkimut qaffassaassallutik.
Siumup siulittaasuata, Aleqa Hammondip oqaatigaattaaq, Piareersarfiit atorunnaarsinneqarnissaat aningaasanik sipaarniarnerinnarmik tunngaveqartoq.
- Inuiaqatigiinni ingerlatsivugut, inuiaqatigiillu tamaasa periarfississallugit sulisussaalluta. Taamaattumik Piareersarfiit atorunnaarsinneqarnissaat tulluanngilaq. Sinneqartoornissaq siunertaralugu pisiniarfinnik ingerlatsinngilagut, inuiaqatigiinninguna ingerlatisuusugut, Siumup siulittaasua taama oqarpoq.
Piareersarfiup matuneqarnissaa pillugu tusarniarneqarsimasut siunnersuummut aamma isumaqataanngillat. Taakku ilagaat Inuussutissarsiornermut Sulisoqarnermullu Naalakkersuisoqarfik aamma Ilaqutariinnermut kommunillu tamanut Naalakkersuisoqarfiit.