Peter Madsen parnaarussivimmi Herstedvesterimi tigummigallarneqartussanngortoq

Akunnernit marlunnik sivisunerusumik eqqartuussisoqareersorlu inuunerup sinnerani parnaarussaasussanngortitap Peter Madsenip Herstedvester Fængselimit qimaareerluni marlunngornermi tigusarineqartup parnaarussivimmi tigummigallarneqarnissaa eqqartuussisup. Morten Juul Nielsenip aalajangerpaa.

Peter Madsen qimaanermini ikiorneqarsimannginnerartoq eqqartuussissuserisuata, Anders Larsenip eqqartuussinerup kingorna oqaatigaa.

AAMMA ATUARUK Peter Madsenip qimaariaraluarnerminut ikiorteqarsimanini nassuerutigigaa

- Pisuunini nassuerutigaa, qimaanerminili nammineq kisimi iliuuseqartuunerarluni, Anders Larsen eqqartuussiffiusup 102-p saani oqarpoq.

Peter Madsen pisuunerartoq taamaalillunilu aamma qimaanermini atersineqanngitsumit inunnilluunniit arlalinnit atersineqanngitsunit ikiorneqarsimanini nassuerutigigaa, eqqartuussissuserisuata eqqartuussinerup aallartinnerani oqaatigigaluarpaa.

Herstedvesterimi killilersuinerit

Eqqartuussissuserisup, Morten Juul Nielsenip parnaarussineq suliap politiinit suli misissuiffigineqaqqissanera pissutigalugu aalajangerneqartoq oqaatigaa. Taamaalilluni Peter Madsenimut maanna allagarsisinnaananilu nakkutigisamik pulaartoqarsinnaanngilaq.

Taamaalillunilu qimaanngikkallarami killilersuinernit sukannernerusunik killilerfiussaaq.

AAMMA ATUARUK Peter Madsen Herstedvesterimit qimaariaraluarnermini tigusarineqartoq

Peter Madsenip Herstedvesterimi paarnarussanut killilersuinerit pissutigalugit qimaasimalluni eqqartuussissuserisuminut oqaluttuarisimagaa Anders Larsenip oqaatigaa.

Eqqartuussineq matoqqasumik ingerlanneqarpoq, taamaammat eqqartuussivimmi susoqarsimanera maannamut isertuunneqarallarpoq. Peter Madsenili eqqartuussinermi nassuiaateqarsimasoq Morten Juul Nielsenip eqqartuussinerup kingorna oqaatigaa.

Qaartartumik sallussuteqartoq

Peter Madsen parnaarussivimmit qimaanini qimaanerminilu inunnut qassiiusunut siorasaarisimanini pissutigalugu unnerluutigineqarpoq.

Pinerluuteqarfigineqartoq siulleq tarnip pissusianik ilisimasaliuvoq. Taanna Madsenip qaartartuuteqarneranik siorasaarneqarpoq, taamaalillunilu parnaarussiviup anisarfianukarsinnaasimalluni.

Anisarfiup eqqaani parnaarussivimmi nakkutilliisoq aamma taama siorasaarpaa, taamaalillunilu matorsuarmik aammaatillugu.

Madsen qimaavoq, parnaarussivimmilu nakkutilliisut malinnipput Madsenillu sumiinnera politiinut oqaluttuaralugu. Malinnittut marluk Madsenip ”illuinnarsiummut assingusumik atortorissaarummik” tungaannut tikkuussineratigut aamma siorasaarneqartut, unnerluussummi allassimavoq.

Atortorissaarut assinga Madsenip biilinut assartuutinut ikinerani aamma atorneqarpoq, biilinillu aquttumut suaartarsimalluni: ”Ingerlagit, ingerlagit. Biilit ingerlatinngikkukkit aallaassavakkit”

Tamatuma kinguninngua politiinit tigusarineqarpoq. Tassanilu qaartartumik ungersaasaqarnerarpoq. Tamannali piviusuunngitsoq paasineqarpoq, tamannali pissutigalugu Madsen politiit qoorortuumik umeqqaneranni nunami aalajangersimasumik akunnerit arlallit issiavoq.

Peter Madsen, tusagassiortumik Sverigemeersumik Kim Wallimik aqqartartuliamini 2017-imi aggustimi naalliutsitseriarluni toqutsisimasutut pasineqarluni eqqartuussaagami inuunermi sinnerani parnaarussassanngortinneqarpoq.