Peter Madsenip qimaariaraluarnerminut ikiorteqarsimanini nassuerutigigaa
Inuunermi sinnerani parnaarussassanngortitap, Peter Madsenip, tarnip pissusaanik ilisimasalik parnaarussivimmilu nakkutilliisoq Herstedvesterimi marlunngornermi sioorasaarpai qimaagaluarlunilu. Taamaaliornerminullu ikiorneqarsimanissaa ilimagigitsik, politiit oqarput.
Unnerluussisussaatitaasup pasilliut taanna Glostrupip eqqartuussiviani pingasunngornermi atuarpaa.
Inuk atersineqanngitsoq inuilluunniit arlallit atersineqanngitsut ikiortigalugit qimaanissamut pilersaarusiortoqarsimasoq, unnerluussummi allaqqavoq.
Unnerluussutit arfinillit atuarneqareermata Peter Madsen pisuusutut nassuertoq, eqqartuussissuserisua oqarpoq.
AAMMA ATUARUK Peter Madsen Herstedvesterimit qimaariaraluarnermini tigusarineqartoq
Madsen qaartartuuteqarnerarluni tarnip pissusianik ilisimasalimmik sioorasaarisimasutut unnerluutigineqarpoq. Taamaalilluni parnaarussiviup anisarfianukarsinnaasimavoq. Angut parnaarussanik nakkutilliisoq tassani aamma sioorasaarpaa matulu ammartillugu.
Herstedvesterimi sulisut marluk Peter Madsen taava malippaat, Peter Madsenillu taamaalinerani illuinnarsuutitut isikkulik sakkuliullugu sulisut marluk taakku sioorasaarlugit.
Kingorna biilinut assartuutinut ikivoq, aquttorlu sakkoq illuinnarsuutitut isikkulik atorlugu sioorasaarlugu.
- Biilit ingerlatinngikkukkit aallaassavakkit, Peter Madsen oqarsimaneragaavoq.
Politiit kinguninngua taava takkupput. Madsen biilinit niusinnneqarpoq, Danmarkimilu ullaap tungaani nalunaaqutaq aqqanermut qiteqqutilersoq tigusarineqarluni.
Peter Madsen, tusagassiortumik Sverigemeersumik Kim Wallimik aqqartartuliamini 2017-imi aggustimi naalliutsitseriarluni toqutsisimasutut pasineqarluni eqqartuussaagami inuunermi sinnerani parnaarussassanngortinneqarpoq.
