Pinerluuteqarsimasunut inissiisarfimmi sulisussaaleqineq Danmarkimit tikisitsinikkut iluarsiivigineqarallassasoq
Københavnip parnaarussiviini immikkoortortami pisortaq misilittagartooq Nuummut ataasinngormat tikippoq. Pisortap pineqaatissinneqarsimasunut Nuummi inissiisarfik ingerlatseriaatsinut malittarisassanullu ikiussavaa, sulisullu ilinniartissallugit, nunatsinni pinerluttunik isumaginnittoqarfimmi pisortaq, Naaja Nathanielsen oqarpoq.
- Peqatigiinni aqutsisortaarpugut, taanna immikkoortortaqarfimmi ilinniartitsinermut suliaqarnermi aaqqissuussissaaq, taavalu pikkorissaasoqartassaaq malinnaajutigalunilu ilitsersuisoqartassalluni. Tamanna ukiup naanissaanuugallartoq ingerlanneqassaaq, tamatumalu kingorna suli pisariaqartitsisoqassanersoq takussavarput, Naaja Nathanielsen oqarpoq.
Ilaatigut sioorasaarisoqartillugu qanoq qisuariarnissaq, sakkortuumillu qisuariartoqartillugu qanoq iliuuseqarnissaq pillugit pikkorissaasoqassaaq taavalu aamma sillimaniarnermut tunngatillugu pikkorissaasoqassalluni.
Immikkoortortami pisortaq pineqaatissinneqarsimasunut ukioq naallugu inissiisarfimmiissaaq.
AAMMA ATUARUK Parnaarussalerisut kattuffiat ministerimut saaffiginninniarpoq
Parnaarussivinni nakkutilliisut soraarnerit misilittagartuullu
Misilittagartuut Danmarkimeersut pineqaatissinneqarsimasunut inissiisarfimmut sulisussaaleqiffiusumut ikiortaasussatut tikittassapput. Herstedvesterimit parnaarussivimmi nakkutilliisut tallimat nakkutilliisuusimasullu arfinillit soraarnerit eqimattakkaarlutik Nuummut oktobarimi, novembarimi decembarillu aallartinnerani tikittassapput.
Taakku pineqaatissinneqarsimasunut inissiisarfimmi sulisut suli ilinniartuusut atuagarsoriarneranni ilaatigut ikiuuttassapput.
Pineqaatissinneqarsimasunut Nuummi inissiisarfimmi sulisunit 42-nit 20-t novembarip aallaqqaataani suli ilinniartuupput.
Misilittagartuunillu sulisoqarnissaq pingaartuusoq Pinerluttunik Isumaginnittoqarfik isumaqarpoq.
- Taama amerlatigisut ilinniartuummata immikkoortortaqarfinni misilittagaqartunik amigaateqarnerput qularnanngilaq, taamaammat misilittagalinnik tikisitsisoqarluni assigiinngitsunut qularutigineqarsinnaasunut ilitsersuisoqarnissaa matumani eqqarsaatigineqarpoq, Naaja Nathanielsen oqarpoq.
Suliniuteqarnerli tamanna pinerluuteqarsimasunut inissiisarfinni nakkutilliisunik siunissami sulisoqalerniarnermut ajornartorsiuteqarnermut iluarsiissutaanngilaq.
Parnaarussiviit Kattuffiata pinerluuteqarsimasunut inissiisarfinni parnaarussivinnilu nakkutilliisutut suliallit peqatigiiffigisaata nakkutilliisunik soraarninngorsimasunik nunatsinnukartitsineq utaqqiisaarutaasumik aaqqiissuteqarnertut oqaatigaa.
AAMMA ATUARUK Parnaarussiviit Kattuffiat ministerimit suli akissutissarsinngitsoq
Akissarsiat assigiinnginnerannut nutaarsiassaqanngitsoq
Peqatigiiffiup danskit kalaallillu nakkutilliisut akornanni akissarsiatigut assigiinngitsoqangaatsiarneranut aaqqiissuteqartariaqarsoraa.
Inatsisinik atuutsitsinermut ministereqarfik akissarsiat assigiinnginnerannut atatillugu nalunaarusiarineqaleruttortumut innersuussivoq. Nalunaarusiami akissarsiatigut assigiinngitsoqarnera ilaatigut misissorneqassaaq, nalunaarusiarli arlaleriarluni kinguartinneqareerpoq. Nalunaarusiap siullermik siornali naammassineqareertussaagaluartup aappaagu naammassineqarnissaa maanna naatsorsuutigineqarpoq.
AAMMA ATUARUK Assigiinngitsunik akissarsiaqarneq pillugu nalunaarusiaq ukiumik ataatsimik kinguartoorpoq
Pinerluttunik Isumaginnittoqarfik sulisussanik amerlanerusunik decembarimi atorfinitsitsiniaqqinniarpoq, tamannali ajornartorsiutaasumut siornatigut aaqqiissutaasimanngilaq.
