Inatsisinik atuutsitsinermut ministereqarfiup Kalaallit Nunaata politiivinut pineqaatissinneqarsimasunillu isumaginnittunut akissarsianik sulinermilu atugassarititaasunik misissuinerup naammassinissaa nutaamik ullulerpaa: Kingusinnerpaamik 2019 naatinnagu.Assi: Rigspolitiet

Kinguarteqqinneqartoq: Assigiinngitsunik akissarsiaqarneq pillugu nalunaarusiaq ukiumik ataatsimik kinguartoorpoq

Kalaallit Nunaata politiivinut pineqaatissinneqarsimasunillu isumaginnittunut akissarsianik sulinermilu atugassarititaasunik misissuinerup naammassinissaa pilersaarutaasumut naleqqiullugu ukiumik ataatsimik kinguartinneqarpoq. Taamaattumik Naalakkersuisut danskillu naalakkersuisuisa suliaq siuusinnerpaamik 2020-mi misissorsinnaavaat.

Kalaallit Nunaata politiivini aamma pineqaatissinneqarsimasunut inissiisarfinni atorfillit akissarsiaqarnerulernissartik suli naammagittarnerullutik utaqqisariaqassavaat.

Taakku akissarsiaat sulinermilu atugassarititaat pillugit misissuinerup naammassinissaa kinguarteqqinneqarpoq kingusinnerpaamik ukioq manna naatinnagu pisussanngorlugu, danskit inatsisinikatuutsitsinermut ministeriat Nick Hækkerup (S) Kalaallit Nunaat pillugu ataatsimiititaliamut allakkami paasissutissiivoq.

- Misissuineq 2019 naatinagu naamassissangatinneqarpoq. Suliaq naammassippat Inatsisinik atuutsitsinermut ministereqarfiup Kalaallit Nunaat pillugu Folketingip ataatsimiititaliaa aamma Naalakkersuisut misissuinerup inerneranik ilisimatikkumaaarpai, taanna allappoq.

AAMMA ATUARUK Akissarsiat assigiinnginnerannik nalunaarusiaq ukiup affaanik kinguaattooqqasoq

2017-imi inatsitsisinik atuutsitsinermut ministeri Søren Pape Poulsen (K) Kalaallit Nunaata politiivinut aamma pineqaatissinneqarsimasunik isumaginnittunut akissarsiaannik sulinermilu atugassarititaasunik misissueqqusivoq.

Tamatumunnga peqqutaavoq Kalaallit Nunaanni aamma Danmarkimi politiini aamma pinerluttunik isumaginnittoqarfimmi atorfeqartut assigiinngitsunik isumaqatigiissuteqartinneqarnerat ukiuni arlalinni isornartorsiorneqareersorlu.

Pilersaarutit naapertorlugit 2018-ip naanerani misissuineq naammassereertussaagaluarpoq, kinguartoorlunili. Folketingimut qinersisoqarnera pissutigalugu upernaaq sulineq unitsinneqarpoq. Massakkullu naammassineqarnissaanut kingusinnerpaamik ukiortaaq piffissaliunneqarpoq.

Aaja Chemnitz Larsen: Naalagaaffeqatigiinnerup iluani kanngunartoq 

Naalakkersuisut aamma Kalallit Nunaata foketingimut ilaasortaatitai arlaleriarlutik politiit pineqaatissinneqarsimasunik isumaginnittut Danmarkimi suleqatiminnut naleqqiullugu assigiinngitsunik akissarsiaqartinneqarmata.

Akissarsiat assigiinnginnerat pillugu folketingimut ilaasortap Aaja Chemnitz Larsenip (IA) inatsisinik atuutsitsinermut ministeri Nick Hækkerup (S) sapaatip akunnerata kingulliup naalernerani oqaloqatigaa.

LÆS OGSÅ Akissarsiat assigiinnginnerannik nalunaarusiaq ukiup affaanik kinguaattooqqasoq

Assigiinngitsunik akissarsiaqartitsineq Aaja Chemnitz Larsenip 'naalagaaffeqatigiiinnerup iluani kanngunartoq'-mik taavaa.

Kisianni Politiforbundet Danmarkimi siulitaasup Claus Oxfeldtip politiit kalaallit danskillu assigiinngitsunik akissaqartinneqarnerat ukioq manna juunimi ilumuunnginnerarpaa. Tassami Kalaallit  Nunaanni politiit siornatigut akissarsiat assigiinnginnerannut aaqqiissutaasumik  tapisiaqartinneqarmata.   

Kisianni Danmarkip iluani politiit sumiinnertik apeqqutaatillugu aamma assigiingitsunik akissarsiaqartinneqarput, nassuiaavoq.

AAMMA ATUARUK Isertitsivinni sulisut kattuffiat:Akissarsiat qaffanneqartariaqarput

- Politiit assigiimmik akissarsiaqartinneqanngillat. Københavnimi politiiusoq Aalborgimi imaluunnit Esbjergimi politiiusoq assigiinnik akissarsiaqanngillat, Claus Oxfeldt oqarpoq.

Sapaatip akunneranut nalunaaquttap akunneri suliffiusussat, sulinngiffeqarneq, sulinngiffeqarluni angalanermut akiliunneqarneq aamma meerartaarnermi sulinngiffeqarneq aamma assigiinngitsumik Kalaallit Nunaanni aamma Danmarkimi suliffeqarfeqarfimmi nalilerneqartarput.  

Kalaallit Nunaanni Politiit Peqatigiiffianni ilaasortat arlallit sulinngiffeqarluni akiliunneqarluni Danmarkimut angalasarnerup atorunnarsinneqarnissaa  2018-imi akerleraat, taannalu Kalallit Nunaanni politiinut isumaqatigiissummii allassimavoq.

Kisianni Politiforbundet i Danmarkip assigiimmik isumaqatigiissuteqartoqarnissaanik Kalaallit Nunaanni Politiit Peqatigiiffiata kissaatigisaa tapersersorpaa.

- Aammami Kalaallit Nunaanni aamma Danmarkimi politiiusugut assigiittorujussuarmik ilinniagarpugut, naalagaaffeqatigiinnerullu iluani assigiimmik isumaqatigiissuteqassagutta iluassaqaaq, tassami sulinitsinni assigiissuteqartorujuugatta, Claus Oxfeldt KNRimut ukioq manna juunimi oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat