Parnaarussiviit Kattuffiata danskit illersornissamut ministerianut Kalaallit Nunaanni pissutsinik ernumangaatsiarnerminik ilalerlugu allakkani septembarip 11-annili nassiussani suli akissuteqarfigineqannginnera piluaraa.Assi: KNR

Parnaarussiviit Kattuffiat ministerimit suli akissutissarsinngitsoq

Pinerluuteqarsimasunut inissiisarfimmi nakkutilliisunik atorfinitsitsiniarneq ajornartorsiutaavoq, akissarsialunnerlu ajornartorsiutaasoq Parnaarussiviit Kattuffiat Pinerluuteqarsimasunillu Isumaginnittoqarfik isumaqarput.

Parnaarussiviit Kattuffiata danskit inatsiseqarnermut ministerianut Kalaallit Nunaanni pissutsinik ernumangaatsiarnerminik ilalerlugu allakkani septembarip 11-annili nassiussani suli akissuteqarfigineqannginnera piluaraa.

Ministereqarfiup nipaappallaarnera pissutigalugu Parnaarussiviit Kattuffiata allakkani, inatsiseqarnermut ministerimut, Nick Hækkerupimut qaammat ataaseq affarlu matuma siorna nassiussani tamanut maanna saqqummersippaa.

- Kalaallit Nunaanni pissutsit pissutigalugit inissiisarfimmi sulisutsinnut iliuuseqartariaqartugut isumaqarpugut. Akissuteqarniarnerup sivisunera pissutigalugu Kalaallit Nunaata oqallisigineqartussanngornissaanut atatillugu iliuusissap tullianut ingerlaqqittariaqarpugut, Bo Yde Sørensen Parnaarussiviit Kattuffianni siulittaasoq, oqarpoq.

Inissiisarfiit affaanni ajornartorsiuteqartoq

Pinerluttunik Isumaginnittoqarfik Danmarkimiit ulluinnarni namminersortumik suliaqartarpoq, taamaakkaluartorli Inatsiseqarnermut ministereqarfik nunatsinni pissutsinut akisussaasuuvoq.

AAMMA ATUARUK Lektori: Nunatsinni ikorfartortissaaleqineq ajornartorsiutaavoq

Nunatsinni pinerluuteqarsimasunut inissiisarfiit arfiniliupput, Pinerluuteqarsimasunillu Isumaginnittoqarfiup oqarnera naapertorlugu taakku affaanni sulisussarsiniarneq ajornartorsiutaavoq.

- Kalaallit Nunaanni nakkutilliisut qaammammut 17.600 koruuninik aallaqqaasiutitut akissarsiaqartarpoq. Atorfinivikkaanni akissarsiat qaammammut 18.700 koruunimut qaffattarput. 

- Danmarkimi parnaarussivinni nakkutilliisut qaammammut akissarsiat tapisiartaat ilanngunnagit 23.000 koruunersisarput..

Tusarfik: Parnaarussiviit Kattuffiat

Ilulissani inissiisarfimmi nakkutilliisut sisamat amigaataapput, sulisunik amigaateqarneq sulisut pingasut napparsimallutik piffissami sivisuumi sulinngiffeqarnerannik ilaatigut pissuteqarpoq. Aasianni atorfinnit arfineq-pingasunit tallimaannaat atuuffigineqarput. Kiisalu pineqaatissinneqarsimasunut inissiisarfiit anginerpaartaanni nutaanerpaartaannilu – Nuummiittumi – atorfiit 49-sut 42-nnaat atuuffigineqarput. Atorfeqartuniilli 24-t suli ilinniartuullutit – taakkunannga sisamat ilinniakkaminnik novembarip aallaqqaataanni naammassissapput.

Ajornartorsiummut aaqqiissuteqarallarneq

Sulisut amerlasuut ilinniartuunertik pissutigalugu atuagarsoriartortarput, tamatuma saniatigut sulisut pingasut napparsimanertik pissutigalugu piffissami sivisuumi sulinngiffeqarlutik. Taamaammat Nuummi pineqaatissinneqarsimasunut inissiisarfimmi sulisussaaleqineq matussuserniarlugu Danmarkimi parnaarussivimmi sulisimasunik soraarninngorsimasunik atorfinitsitsisoqartariaqarpoq.

Parnaarussiviit Kattuffiata tamanna ajornartorsiutaasumut aaqqiigallarnerunerarpaa, piffissamullu ungasissumut aaqqiissutaasinnaanani.

AAMMA ATUARUK Sulisut peqatigiiffiat inissiisarfittaami pissutsinut isumakuloqisoq

Parnaarussiviit Kattuffiata Pinerluuteqarsimasunik Isumaginnittoqarfik ajornartooqqanerminik kivitsiniassaguni nakkutilliisut akissarsiaat piaarnerpaamik pitsanngorsarneqartariaqartut oqaatigaa, Danmarkimiillu sulisussanik tikisitsineq aaqqiissutaannginnerarlugu.

- Danmarkimi nakkutilliisunik nassiussisinnaanngilagut, Danmarkimimi sulisunik aamma amigaateqaqaagut, taamaammat qisuariartitsisariaqarpugut, Parnaarussiviit Kattuffianni siulittaasoq, Bo Yde Sørensen oqarpoq.

Nunatsinni pinerluuteqarsimasunik isumaginnittoqarfiup akissarsiat qaffasinnerusut sulisussarsiornermut iluaqutaanissaat isumaqatigaa.

- Nunatsinnimi suliffissaaleqisoqarpallaanngitsoq takusinnaavarput, tamannalu ajunngilluinnarpoq. Kisianni tamanna pissutigalugu sulisussarsiniarnerput ajornarneruvoq, akissarsiallu qaffasissusaata aaqqiissuteqarfigineratigut suliffeqarfiit allat sulisussarsiornermi unammillersinnaalissavagut, nunatsinni Pinerluuteqarsimasunik Isumaginnittoqarfimmi pisortaq, Naaja Nathanielsen oqarpoq.

Inatsiseqarnermut ministereqarfiup Parnaarussiviit Kattuffiannut akisussuteqarnissani sulissutigigaa, Inatsiseqarnermut ministereqarfiup KNR-imut ilisimatitsissutigaa. Akissarsianilu atugassarititaasut pillugit pitsanngorsaateqartoqalilersoq ministereqarfiup ilanngullugu oqaatigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat