Perlukut qimminut nerukkaatissatut tunisassiarineqartut

Toqoraaviup misiliutitut perlukunik qimminut nerukkaatissiorsimanera iluatsilluarsimammat maanna qimmiutillit Neqi A/S-imit qimminut nerukkaatissanik pisisinnaanngortut toqoraavik tusagassiuutinut ilisimatitsivoq. 

Toqoraanermi perlukut 1950-kkunniilli igiinnarneqartarsimagaluarput nunamullu assaatiinnarneqartarlutik, maannali taamaaliortoqarunnaarpoq. 

Kommuni Kujalleq 2014-mi aalajangerpoq perlukut nunamut assaatiinnarneqartarnerat unissasoq.

Neqi A/S taama aalajangernerup kingorna perlukunik tunisassiorsinnaalerniarluni suliniuteqarluni aallartissimavoq. 

Ilulissani Sisimiunilu qimmiutillit misileraatitut nerukkaatissanik katillugit 800 kiilunik nassinneqarsimapput. Misileraanerulli inernera iluarisimaarnartuusoq, Neqi A/S-imi pisortaq, Per Jensen tusagassiuutinut allappoq. 

Nerukkaatissanik tunisassiulerneq suliffissanik pilersitsisimasoq kiisalu nerukkaatissanik inuussutissartaqarluartunik pisisinnaanermik periarfissiisimasoq aamma oqaatigineqarluni. 

Nerukkaatissat toqaraavimmi Neqi A/S-imi kiisalu Pisisa.gl-ikkut pisiarineqarsinnaapput. 

AAMMA ATUARUK Neqi A/S: Ukioq manna tunisineq naammassilluarpoq