Peqquserluttuliortoqarnerata kingunerisaanik pisortat marluk atuuffimminiikkunnaarsinneqartut
Illersornissamut ministeri, Trine Bramsen tusagassiortunik marlunngornermi katersortitsinermini taama paasissutissiivoq.
Illersornissamut ministereqarfiup illuutaanik aqutsisoqarfimmi pisortaq sulisussaatitaajunnaarpoq, suliffeqarfissuullu immikkoortortaani pisortaq allamut atuuffimmut nuutsinneqarluni. Tamatuma saniatigut Illersornissaqarfiup susassaqarfiini pisiniat tamarmik qulaajarneqarput.
AAMMA ATUARUK Illersornissaqarfimmi qassiiusut peqquserluuteqarsimasinnaasutut pasineqartut
Tamanna Illersornissamut ministereqarfiup illuutaanik aqutsisoqarfimmi sulisut 1,8 millionit koruuninik akiliilluni peqquserluuteqartoqarsimanerata kiisalu pisortat aningaasaataasa imminnut iluaqutaasussanut atorneqarsimanerisa paasineqarneratigut pivoq,
Aammattaaq inuussutissarsiutillit namminersortut marluk suliffeqarfimmilu sanaartugassanik suliassinneqartartumi sulisuusimasoq peqquserluttuliornermut suliamut atatillugu aamma pasineqarput.
AAMMA ATUARUK Peqquserluttuliortoqarnerata paasineqarnerata kingorna: Illersornissamut ministerip nunatsinnukarnissani kinguartippaa
Naalagaaffiup kukkunersiuisui aqutsisoqarfimmi aningaasanik atornerluisoqarsinnaanera pillugu isertortunik siammarterisumit tassa whistleblowerimit 2016-imi paasitinneqareermata suliaq aallartinneqarpoq. Naalagaaffiup kukkunersiuisui paasitinneqarnermi kingorna misissuivoq tamannalu assigiinngitsunik unnerluutiginninnernik kinguneqarpoq.
- Aningaasat eqqortumik atorneqarnissaanut tatiginninnissaq pingaarluinnarpoq. Peqqusersusaarnerit peqquserluttuliornerillu akuersaarneqarsinnaanngilluinnarput. Taamaammat Illersornissaqarfimmi peqquserluttuliornerit ilungersunartorujussuarmik suliaraakka, illersornissamut ministeri, Trine Bramsen oqarpoq.