Illersornissaqarfimmi qassiiusut peqquserluuteqarsimasinnaasutut pasineqartut

Naalagaaffiup aningaasartuutaanik kukkunersiuisut misissuinerisigut sulisut ukiorpassuarni allanik akuutitsinatik nioqqutissanik kiffartuussinernillu inniminniisarsimanerat paasineqarmat Illersornissaqarfiup Illuutinik Aqutsisoqarfiani sulisut marluk politiinut ippassaq unnerluutigineqarput.

Kukkunersiuisut misissuineratigut sulisut Illersornissaqarfiup Illuutaanik Aqutsisoqarfia sinnerlugu pisuusaartitanik pisisarsimanerat paasineqarpoq.

Aqutsisoqarfik 2 milliardit koruuninik missingersuuteqarluni Illersornissaqarfiup sanaartornermut sanarfinermullu suliniutaannut tamanut kiisalu Illersornissaqarfiup illuutaasa tamarmik ingerlanneqarnerannut akisussaasuuvoq.

Kukkunersiuisut misissuinerat tunuliaqutaralugu sulisut marluk peqquserluuteqartutut politiinut unnerluutigineqarput.

Illersornissamut ministeri: Ilungersunartorujussuuvoq

Politiinit tigusarineqartut marluk aaqqissuussinermi periarfissanik atornerluisimasutut pasineqartut, illersornissamut ministerip, Trine Bramsenip (S) uppernarsarpaa.

- Ilungersunartorujussuartut isigivara, Taama pisoqarsinnaanngilaq, Kukkunersiuisut isornartorsiuinera aatsaannarlunga atuarpara. Taamaattoqassanngilaq, taamaammat sukangasorujussuarmik iliuuseqarniarpunga, Trine Bramsen oqarpoq.

Kukkunersiuisut Illersornissaqarfiup Illuutaanik Aqutsisoqarfimmi sulisunit pisiarineqartartorpassuit misissorpai. Matumanilu pisinerit 75 procentiini naatsorsuinermik malittarisassat nalinginnaasut unioqqutinneqarsimasut paasineqarpoq.

Inniminniinerit, tunniussinerit akiliinerillu nakkutigineqarnerisa amigaataanerata saniatigut nioqqutissat kiffartuussinerillu tunniunneqanngitsut aamma akilerneqartarsimapput.

Aammattaaq pisinerit kukkusut 80 procentiinit amerlanerusut inniminnerneqarsimapput, decembarimilu akilerneqariarlutik ukiup tullissaani aatsaat tunniunneqartarsimapput.

Naalagaaffiup kukkunersiuisua: Annilaarnartorujussuuvoq!

Angutit allat tallimat akiliilluni peqquserluttutut, akiliilluni peqquserlunnermut suleqataasutut piginnaatitaanermillu atornerluisimasutut ullumi aamma pasineqarput.

Suliami pisimasut 450-it pineqarput. Angutit marluk Illersornissaqarfimmi sakkutuujunatik siornatigut sulinikuusut, tusagassiuutinut nalunaarummi allassimavoq. Unnerluussut naapertorlugu 1,8 millionit koruunit tikillugit peqquserluutigineqarsimapput.

- Tamanna annilaarnartorujussuuvoq. Assingusumik nalaataqarnikuunngilanga. Ukiuni 20-ni naalagaaffimmi kukkunersiuisuuvunga, assingusumillu nalaataqarnikuunanga. Tupannangaatsiarpoq, taamaammat aamma sakkortuumik isornartorsiuteqarluta oqaaseqarpugut, naalagaaffiup kukkunersiuisuisa siulittaasuat, Dansk Folkepartimeersoq, Henrik Thorup oqarpoq.

Naalagaaffiup kukkunersiuisui naalagaaffiup aningaasaqarneranik nakkutilliisuupput. Taakku akileraartartut aningaasaataasa Folketingimi aalajangerneqartutut sapinngisamillu sunniuteqarluartunut atorneqarnissaat nakkutigisussaavaat. Naalagaaffiullu kukkunersiuisuisa Illersornissaqarfiup Illuutaanik Aqutsisoqarfiup paasissutissat ilaannakortut eqqunngitsullu tunniussimammatigut tamanna ”akuersaarneqarsinnaanngilluinnarnerarpaat”.