Peqqissaasoq Lotte Reimer toqqissisimanngilaq: Aarlerinarnerpaami inissisimasut ilaanniippugut

Lotte Reimer Qasiannguani peqqissaasuuvoq. Taassuma suleqatai Danmarkimeersut nunatsinnut tikinnerminni angerlarsimaqqaartariaqanngitsut ilagaat.
- Misigisimanartarpoq qaninnerpaatut tunillatsinnissamut ernumaneq, taavalu aamma amerlanerusugut ilaqutaqarluta, taakkulu angerlarfigisarlugit assigiinngitsorpassuarnik eqqarsaatinik pilersitsisarpoq, Lotte Reimer oqarpoq. Assi © : Privat
oktobarip 16-at 2020 17:00
Nutserisoq Connie Fontain

Qasigiannguani peqqissaavimmi Lotte Reimerip suleqatimi Danmarkimiit tikeqqammersut coronavirusimik tunillatsinnikuusimasinnaanerat ernummatigaa.

- Soorunalimi aalassaqqasarpugut, nalunagu tikittoqaliivissoq. “Suminngaanneerpa? Danmarkip sukutsitaaneerpa? Danmarkimi tunillaassuinerpaaffiup immikkoortuaninngaanneernerluni, Lotte Reimer KNR-imut oqarpoq.

Eqqarsaasilli takkuttartut taakkuinaanngillat.

AAMMA ATUARUK Nakorsaaneq peqqissaasut ernumasut pillugit: Napparsimasut coronap ernumassutigineranit pingaarnerupput

- Misigisimanartarpoq qaninnerpaatut tunillatsinnissamut ernumaneq, taavalu aamma amerlanerusugut ilaqutaqarluta, taakkulu angerlarfigisarlugit assigiinngitsorpassuarnik eqqarsaatinik pilersitsisarpoq, peqqissaasoq oqarpoq.

Tikerlaat tikinnerminni ulluni tallimani angerlarsimaannartartussaagaluarput – ullullu tallimassaanni allatuulli misissorteqqittassallutik. Taamaakkaluartorli inuit ilaat erngertumik sulisinnaanissaminnut immikkut ittumik akuersissuteqarfigineqartarput. Taakkumi inuiaqatigiinni pingaarutilimmik atorfeqarput – taamaammallu nunatsinni peqqinnissaqarnermi pisariaqartinneqarluinnarlutik. Allatut oqaatigalugu sulisinnaasut tamarmik pisariaqartinneqarput.

Napparsimasut aamma aarlerinartorsiortinneqartut

Lotte Reimerip peqqissaavinni suleqatitik tikerlaat napparsimasunik passussisariaqartartut aamma erseqqissaatigaa. Taamaalillunilu napparsimasut aamma aarlerinartorsiortinneqartut, peqqissaasoq naliliivoq.

-  Ernumanerput allanut takutinnaveersaartarparput aamma ernumatitserusunnata. Tamanna nukippassuarnik soorunami atuiffiusinnaasarpoq, taanna oqarpoq.

AAMMA ATUARUK Peqqissaasut ernumasut: Suleqatit nutaat tunillaassuisuusinnaapput

Peqqissaasut Kattuffiata peqqinnissaqarfimmi sulisut tikerlaat napparsimmavinni sulilertinnagit ulluni tallimani angerlarsimaqqaartarnissaat kissaatigaa.

- Isumaqarpunga aamma pingaaruteqartoq peqqinnissaqarfimmi sulisut tunillatsissinnaanermut aarlerinartoqarnera pillugu erseqqissumik oqaloqatigineqassasut, Lotte Reimer oqarpoq.

Peqqinnissamut aqutsisut aarlerinartoqarnera nassuerutigaat: Ataatsimiinneruniarsarissaagut

Peqqissutsimut Pitsaaliunermullu Aqutsisoqarfiup pisortaata, Joanis Erik Køtlumip Lotte Reimerip peqqissaasullu allat kattuffimmiittut ernumassuteqarnerat paasisinnaavaa.

- Peqqissaasut Kattuffianniittut ernumanerat paasisinnaavara, taanna oqarpoq.

- Ima oqaatigilara: Nunatsinniittut angalasimanngitsullu sulisinnissaat naammagisinnaasuugutsigu taamaaliorusunnerussagaluarpugut. Kisianni atuuffiit ilaat paarlaagallartunit angalasunillu matussusertariaqarpagut. Taamaammat pissutsit imaapput nunatsinni tunillatsittoqartinnaveersaassavarput – kisianni aamma napparsimasunik passussissaagut.

Tikerlaat allatuulli angerlarsimaannaqqaartassagunik tamanna peqqinnissaqarfinni immikkoortut ilaat matusariaqassapput imaluunniit amigartunik sulisoqartariaqassalluni, aqutsisoqarfiup pisortaa oqarpoq.

- Kikkut tamarmik angerlarsimaannassagunik taava immikkoortortaqarfinni matusariaqartoqapajaassaaq. Tamanna aaqqiissutitut attanneqarsinnaanngilaq. Assersuutigalugu peruluttut uninngavianni paarlattaasut piffissallu sivikitsup ingerlanerani sulisut amerlapput. Aamma angalasut tamarmik angerlarsimaannaqqaartassagunik nunap immikkoortuani nakorsaaneqarfinni sulisut amigalissapput.

Sulisut ernumasut maanna qanoq iliuuseqarfiginiarpisigit?

- Ataatsimiinnerit amerlanerulissapput, tassani sulisut paasissutissiiffigineqartassapput. Ilisimanassuseqarneranut kissaatiginngisatsinnik pisoqarnissaanut qanoq killilersimaariniarnerput pillugu oqaluttuarissavarput, Joanis Erik Køtlum oqarpoq.