Peqqissaasut ernumasut: Suleqatit nutaat tunillaassuisuusinnaapput
Peqqinnissaqarfimmi peqqissaasut qinnguartaasartullu sullivimminni ulluni makkunani toqqissisimanngillat.
- Tamanna Namminersorlutik Oqartussat ulluni tallimani angerlarsimaannarnissaq pillugu maleruagassiaata suleqatitaaminnut atuutsinneqannginneranik– taamaammallu tikinniariarlutik sulilersarnerannik patsiseqarpoq.
Peqqissaasut Kattuffiat tusagassiuutinut nalunaarummi allappoq.
Kattuffiup oqarnera naapertorlugu peqqissaasut qinnuguartaasartullu piffissami kingullermi ernumallutik saaffiginnittaqattaarput.
Peqqinnissaqarfimmi sulisut inuiaqatigiinni pingaarutilimmik inissisimanerat pissutigalugu nakorsaanerup immikkut ittumik akuersissuteqarsinnaaneratigut peqqinnissaqarfimmi atorfinittut nutaat erngertumik sulilersinnaapput.
Tamannali isornarluinnartoq Peqqissaasut Kattufiat isumaqarpoq:
Peqqissaasut Kattuffiata isornartitai:
Peqqissaasut Kattuffiata immikkoortut sisamat peqqinnissamut aqutsisoqarfimmit iliuuseqarfigineqartariaqartut isumaqarput:
Siullertut Peqqinnissaqarfimmi sulisut allat tunillatsissinnaanerisa annertusinera naleqqutinngitsoq isumaqarpugut. Tassanngaanniillu nammineq ilaquttanik tunillaasinnaanissaq annertusilluni.
Aappassaattut uninngasut sanngiiffeqareersut tunillatsissinnaanerisa annertusinera ajornartorsiutitut annertuutut isigaarput. Isumarput naapertorlugu innuttaasut isumannaatsumik pineqarnissaannik ajoqusiineq akuerineqarsinnaanngilluinnarpoq.
Pingajuattut isumarput naapertorlugu atorfinerlaat suleqatinut napparsimasunullu taniluutitsilersinnaasutut naapertuilluanngitsumik akisussaaffilernissaat kukkunerulluinnarpoq.
Sisamaattut isumarput naapertorlugu kikkut tamarmik ulluni tallimani angerlarsimaannarallarnissaannut akisussaafik angisooq Peqqinnissaqarfimmi qullersat tigussavaat. PK-ip isumaa naapertorlugu akisussaaffimmik tigusineq, ersarilluinnartunik maleruagassiorneq aqutsisunullu ataasiakkaanut peqqinnissakkut ajunaarnersuaqarsinnaaneranut akisussaasuusussanut, akisussaaffiup tamatuma tunniutinnginnissaa Peqqinnissaqarfimmi qullersanut iliuusaassaaq tulluartoq.
- Atorfinerlaat kisimik ulluni tallimani angerlarsimaannarnissaat apeqquserparput! Ass. feeriareernermi atorfeqavissunut ulluni tallimani angerlarsimaannartarnissaq piumasaqaataavoq.
- Taama assigiinngisitsineq isumaliortaatsimut naleqqutinngilluinnarpoq isumatusarnerunanilu akuerineqarsinnaanngilaq Peqqinnissaqarfimmullu ilungersunartorsioreersumut ilungersortitsinerulerluni. Taamaammat PK-ip taama assigiinngisitsineq isornartutut annertuumillu naapertuilluanngitsutut isumaqarfigaa.
Kattuffiup peqqinnissaqarfimmi aqutsisut peqqinnissaqarfimmi atorfinittunut nutaanik piumasaqaasiornissaat taamaammat piumasaraa – angalasutut allatuulli ulluni tallimani angerlarsimassapput covid-19-imillu tunillatsissimannginnermut uppernarsaateqassallutik.
- Sulisut tamarmik tunillatsissinnaanermut sapinngisamik minnerpaaffissalimmi sulisinnaanissaannik kikkullu tamarmik – atorfeqavissut atorfinerlaallu – assigiimmik atugassinneqarnissaat PK-ip Peqqinnisaqarfimmi qullersanut piumasaqaatigaa.
