Nakorsaaneq peqqissaasut ernumasut pillugit: Napparsimasut coronap ernumassutigineranit pingaarnerupput

Peqqissaasut suleqatimi timmisartoqqammersut ilaasa ulluni tallimani angerlarsimaqqaartariaqartannginnerat pissutigalugu coronamik tunillaasinnaanerat ernummatigaat. Henrik L. Hansenip tamanna illersorneqarsinnaasoraa.
- Tamannami peqqinnissaqarfimmiikkaluarpat inuiaqatigiinniluunniit suliassani utaqqisinneqarsinnaanngitsuni kingunerlussinnaavoq, Henrik L. Hansen oqarpoq. Assi © : KNR / Malik Brøns
oktobarip 16-at 2020 14:28
Nutserisoq Connie Fontain

Peqqinnissaqarfimmi sulisinnaasut tamarmik pisariaqartinneqarput. Taamaammat sulilersut nutaat nunatsinnut tikittut tamarmik ulluni tallimani angerlarsimaannarnissaannut piffissaqanngilaq.

- Pissutsit akimmisaarnartumik ingerlanneqarunik taava napparsimasorpassuit katsorsarneqarsinnaajunnaarataassapput, inuunerminnillu aarlerinartorsiortut katsorsarneqarsinnaanavianngillat. Pissutsit taamaalissagunik ilungersunartorujussuussaaq.

Nakorsaaneq, Henrik L. Hansen KNR-imut oqarpoq.

AAMMA ATUARUK Peqqissaasut ernumasut: Suleqatit nutaat tunillaassuisuusinnaapput

Nunatsinni Peqqissaasut Kattuffiata atorfinittut nutaat Danmarkimit timmisartukkut tikittut ulluni tallimani angerlarsimaannaqqaaratik sulilertarnerat naleqqutinngissoraa. Taakku suleqatiminnut napparsimasunullu tunillaassuinissamut aarlerinartorsiortitsisut peqqissaasut isumaqarput.

Inuit Ataqatigiit oqallinnermut maanna aamma akuliuppoq. Inuit Ataqatigiinnit Stine Egedep peqqinnissaqarfimmi sulisut napparsimareersullu tunillatsikkaluarpata tamanna ajutoorujussuarnerussasoq isumaqarpoq.

Taassuma peqqinnissamut naalakkersuisoq, Anna Wangenheim (S) nakorsaaneqarfillu peqqissaasunut ernumasunut atatillugu iliuuseqaqquai.

Nakorsaaneq: Suliassanik utaqqisinnaanngitsoqarpoq

Peqqinnissaqarfimmi sulisut inuiaqatigiinni pingaarutilimmik inissisimanerat pissutigalugu nakorsaanerup immikkut ittumik akuersissuteqarsinnaaneratigut peqqinnissaqarfimmi atorfinittut nutaat erngertumik sulilersinnaapput.

Nakorsaanerup oqarnera naapertorlugu peqqinnissaqarfimmi immikkut ittumik akuersissuteqartarneq illersorneqarsinnaasumik nalilerneqartarpoq. Inuup inuunera tunillaassuuttoqarsinnaaneralu tamarmik eqqarsaatigilluassagaanni ajortut marluk qinigassaapput.

- Taamaammat pisut ilaanni napparsimasut katsorsarneqarsinnaassanngillat. Pissutsillu taakku pissutsinut suli ajornerulersitsissapput. Naallu sulisitsilluni aarlerinartorsiortitsisoqaraluartoq suliassap suliarineqarsinnaanngilluinnarsinnaanera eqqarsaatigisariaqarpoq.

AAMMA ATUARUK IA peqqissaasut ernumasut pillugit: Naalakkersuisoq maannakkut iliuuseqassaaq

- Tamannami peqqinnissaqarfimmiikkaluarpat inuiaqatigiinniluunniit suliassani utaqqisinneqarsinnaanngitsuni kingunerlussinnaavoq, Henrik L. Hansen oqarpoq.

Nakorsaanerup oqarnera naapertorlugu aallannginnermi tunillatsissimannginnermut uppernarsaammik annerpaamik ullunik tallimanik pisoqaassusilimmik peqarnissap piumasaqaataanera tunillaassuisinnaanermut aarlerinartumut annikillisaataavoq. Tamatumalu saniatigut ullormi aallarfissami napparsimasoqartussanngilaq.

- Kisianni soorunami aarlerinartorpoq, tamannali inuiaqatigiinni ingerlaannartoqarsinnaanissaanut sulakkeerissagutta avaqqussinnaanngilarput. Taamaammat immikkut ittuni pisinnaatitsinissatsinni aarlerinartoqalaarnera akuerisariaqarparput.

- Tamatumalu saniatigut sulinerup ingerlannissaanut akuersissuteqartoqarpat sillimaniarnermut immikkut ittumik piumasaqaateqartoqaannassaaq, assersuutigalugu anersaartuutinut illersuummik atugaqarneq taamaalilluni tunillaasinnaanermut aarlerinartumik annikillisitsisoqassaaq.

Peqqissaasut akuersisariaqartut

Peqqissaasut ernumanerannut atatillugu nakorsaaneq aalajangiisussaaguni taakku akuersisariaqarput:

- Susoqarneranut malinnaaqqissaarpugut. Piffissami matumani naligiissaarinigut eqqortuusoraagut, pitsaanerpaarlu tassaalluni napparsimasut pisariaqartitaat malillugit peqqinnissaqarfimmi suliaqarneq.

- Naapertuutinngitsumik malugisaqarutta iliuuseqarfigissavarput. Kisianni inuiaqatigiinni immikkut ittumik akuersissuteqarfiusni aamma peqqinnissaqarfimmi pissutsit maannakkut isumannaatsumik ingerlanneqartut isumaqarpunga.

KNR-ip Peqqissutsimut Naalakkersuisoq, Anna Wangenheim (D) oqaaseqartinniarsarigaluarpaa. Taassuma naalakkersuisoqarfiata nakorsaaneq peqqinnissamullu aqutsisoqarfik innersuussutigai.