Peqqinnissaqarfimmik atuisut isumaat misissuiffigineqalersoq
- Saaffiginnikkaluarama ataqqineqanngilanga, saaffiginnikkaluarama iisartakkanik tunineqaannarpunga, tassalu peqqinnissaqarfimmut saaffiginninnerup siulliup qanoq misigititsinera pillugu misissuisitsineq taama imaqassaaq, peqqissutsimut naalakkersuisoq Martha Abelsen taama oqarpoq.
Misissuineq qanoq ingerlanneqassanersoq 2019-imi qaammatini siullermi paasiniarneqassaaq, ilaatigut apersugassat immersuissanersut imaluunniit peqqinnissaqarfimmut saaffiginninneranni apersorneqartassanersut nalilersorneqassalluni.
AAMMA ATUARUK Peqqinnissaqarfiup sulisussarsiornera unammillernartupilussuusoq
Peqqinnissaqarfimmik atuisut saaffiginninnerisa pitsaanerulernissaat misissuinerup siunertaraa.
- Sullissinerup pitsanngorsartuarnissaa Naalakkersuisunit pingaartipparput, imaanngitsoq suna tamarmi naammassippat, una pilersaarut nutaaq aallartippat, kisianni paasisagut nutaat tunngavigalugit ingerlaavartumik pitsanngorsaajuarnissaq sungiuttariaqaratsigu, Martha Abelsen oqarpoq.
Taava nakorsiat, uninngasut allatullu atuisut peqqinnissaqarfimmit qanoq tikilluaqquneqarnermik misigisaat misissuineq naammassippat saqqummiunneqassapput.
AAMMA ATUARUK Lægeforeningen efterlyser penge til sundhedsvæsnet
Taava aamma taakkua qanoq saaffikkuminarnerulluni sullissisinnaanermut ineriartornissamut atorneqassapput.
- Misissuisitsinermit paasisat aallaavigalugit sutigut aaqqiisoqarsinnaanersoq qulaajassavarput, qanorlu ililluta sullissisinnaanerput pitsaanerpaamik qaffanneqarsinnaanersoq anguniassallutigu, peqqissutsimut naalakkersuisoq Martha Abelsen oqarpoq.
Atuisut isumaannik misissuineq 2019-ip ingerlanerani qaqugorpiaanersoq aalajangigaanngitsumik pissaaq.
