Peqqinnissaq pillugu atuagaq nutaaq
”Pingaartitat peqqinnissakkullu perorsaaneq – Kalaallit Nunaanni pinaveersaartitsinerup peqqinnerulersaanerullu ineriartornera”. Peqqinnissalerinermi pingaartitat pillugit atuagaq nutaaq taama atserneqarluni saqqummersinneqarnialerpoq.
Peqqinnissaq atugarissaarnerlu inuit ulluinnarni angerlarsimaffimmi, atuarfimmi nunaqqatigiillu iluanni qanillugu atorfigalugu sulinermi pingaarutillit atuakkami sammineqarnerupput.
Oqariartuutaasa pingaarnerit ilagaat inuup pineqartup pingaartitai kulturikkullu tunuliaqutai apeqqutaallutik peqqissuseq inunnit assigiinngitsunit assigiinngitsumik paasineqartartoq.
Inuit namminneq inuunermik passunnissaannut periarfissaasa pitsanngorsarnissaat peqqissutsimullu tunngatillugu naammagittaannanngitsumik pissuseqaleriartornissaat neriuutigineqarput.
Atuagaq, kalaallit danskillu peqqinnissamik suliallit suliartik pillugu oqaluttuarisaannik ilaatigut imalik, Danmarks Pædagogiske Universitetimeersunit Karen Wistoftimit Karsten Schnackimillu aaqqissugaavoq.
