Pele Broberg Sisimiunut nuuttoq kommunalbestyrelsimilu ilaasortaajunnaarluni
Naleraq sinnerlugu Kommuneqarfik Sermersuup kommunalbestyrelsiani ilaasortaq Pele Broberg Sisimiunut nuulerpoq, taamalu kommunalbestyrelsimi ilaasortaajunnaassalluni.
Kommunimiimmi kommunimut allamut nuukkaanni inatsisit malillugit kommunalbestyrelsimi pineqartumi ilaasortaasoqarsinnaanngilaq.
- Aasaq manna kommunimut kiisami iseraluartunga nuliara Qeqqata Kommuniani atorfininnikuugami, meeqqattalu Danmarkimut ilinniariartornerannut atatilllugu tamatta Sisimiunut nuuttussanngorluta, maannakkullu piffissanngormat uanga inatsisit malillugit Sisimiunut aamma nuullunga, Pele Broberg KNR-imut oqarpoq.
Taanna Kommuneqarfik Sermersuup kommunalbestyrelsianut 2021-mi apriilimi qinigaavoq, taassumalu saniatigut inatsisartunut aamma qinigaalluni.
Naleraq Inuit Ataqatigiit peqatigalugit kingorna naalakkersuisoqatigiilermata Pele Broberg nunanut allanut tunngasunut, inuussutissaqarnermut niuernermullu tassani naalakkersuisunngorpoq, kommunalbestyrelsimilu ilaasortatut taava sulinngiffeqarallalerluni.
Kommunalbestyrelseimit ukiuni marlunni sulinngiffeqareertoq
Ukiut marluk sulinngiffeqareerluni kommunalbestyrelsimut ilaasortanngoqqinniarnini Pele Brobergip ukioq manna apriilimi nalunaarutigaa. Sivikitsuinnarmillu maanna tassa ilaasortaareerluni kommunalbestyrelsimi qaammatit arfinillit qaangiuttullu ilaasortaajunaartussanngorpoq.
Pele Brobergip kommunalbestyrelsimi ilaasortaajunnaavinnissaa eqqarsaatigalugu qinersisartumi tamanna pakatsissutigisinnaaneraat aperigatsigu ima akivoq:
- Kommunimiit sulingiffera unitsillugu suliniarlunga aallartisaruttortunga tassa nuliama atorfininnera ilutigalugu taamatut inissisimaneq qinersisartukka amerlanerit nalunngilaat aamma soorunami ataqqivaat, Pele Broberg oqarpoq, nangipporlu.
- Isummakka ersarittaqisut sinniisoralunga taamatut qinernikuullunga immaqa neriuutiginaraluarpoq immaqa aamma suli taamaassinnaassallunga, kisianni pilluaqqusisorpassuit tusaallugit nuannaartorpassuillu Sisimiuni najugaqalernitsinnut tusaavagut,
Kommuninut kingullermik 2021-mi apriilimi qinersisoqarmat 282-init taaguunneqarpoq, Finn Karlsenilu Kommuneqarfik Sermersuup kommunalbestyrelsianut sinniisutut maanna ilaasortanngussaaq.
