Pele Broberg Naleqqami siulittaasunngorpoq

Naleqqami immikkut ittumik ataatsimeersuarnermi allanik unammillertoqanngilaq.
Pele Broberg Naleqqami siuttulerpoq, Hans Enoksen tunuariataarmat.
Allattoq Jens Thorin
juunip 25-at 2022 09:42

Pele Broberg Naleqqami, Inatsisartuni sisamanik ilaasortaqartumi, nutaatut siulittasunngorpoq. Immikkut ittumik ataatsimeersuarnermi siulittaasussatut allanik sassartoqanngilaq.

Pele Brobergip partiimi siuttutut atuuffik tiguaat partiillu sammivissaanut tikkuusisuusussanngorluni. Taassuma Hans Enoksen ataasinngormat tunuariataartoq kingoraarpaa.

Partiip politikikkut oqaaseqartartua, Jens Napaattooq, partiip politikkikkut siulittaasup tulliatut toqqagaavoq, aamma unammillerteqarani.

50-inik ukiulik Pele Borberg suliffinnik aallarnisaasartuuvoq timmisartunillu ingerlatsisuulluni. Taanna 2018-imi naalakkersuinikkut sulilerpoq, taamani 208-nit taaguunneqarluni partiiminni qinigaanerpaap, partiimik pilersitsisup Hans Enoksenip, tulliatut inissilluni. Siumu Inatsisartuni partiit angernersaaattut Naleraq, Atassut, Nunatta Qitornaalu peqatigalugit naalakkersuisoqatigiinnik pilersitsimmat, aningaasaqarnermut naalakkersuisunngorpoq. Nalerarli Naalakkersuisoqatigiinnit ukioq taanna ukiarluarnerani tunuarmat, naalakkerrsuisutut atuuffini qimappaa.

2021 qinigaaqippoq – maanna 550-init, tassalu partiimi qinerneqarnerpaap tulliatut inisseqqilluni taaguunneqarluni. IA partiit annersaaattut Naleraq naalakkersuisoqatigiinnik apriilip 16-ani pilersitseqatigimmagu, nunanut allanut tunngasunut, niuernermut, silap pissusiata allanngoriartorneranuttunngasunut inuussutissarsiornermullu naalakkersuisunngorpoq. Partiili taamani ikorfartortaasoq Atassut tatiginnikkunnaarmat, naalakkersuisuniit qaammatit tallimat sinnilaarlugit qaangiuttut tunuarpoq.

Inatsisartunut ilasortaasimasoq, Knud Fleischer, partiip siulittasuata tulliatut, partiip aaqqissuussaaneranik suliaqartussatut, qinigaavoq. Inatsisartunut ilaasortaanermini Kattuseqatigiit Partiiat, partiitut 2014-mi atorunnaartoq, tunuliaqutigaa.