Thomsen: Patajaassuseq naalakkersuinermi pisariaqarpoq
- Nunatsinni ineriartorneq, tamatta kissaatigeqisarput, piviusunngorsinnaassappat, aamma politikkikkut toqqissisimanartumik ingerlatsisoqartariaqarpoq. taannalu massakkut uppernarseqqipparput, massakkut siuttuusut qulakkeersinnaanngikkaat,
Demokraatit siulittaasuat, Niels Thomsen, KNR-imut oqarpoq.
Partii Naleraq naalakkersuisoqatigiinniit tunuarmat, Kim Kielsen inatsisartut ataatsimiinngineranni nutaannik nalakkersuisoqatigiiliorusuppoq. Kim Kielsenilu naalakkersuisoqatigiiliornissamik eqqarsaateqarluni qaaqqusippat, Demokraatit naammassisaqarniarlutik oqaloqataajumaartut, Niels Thomsen oqaluttuarpoq.
- Tassa aningaasarsiornermut eqqarsartariaatsigut partiit aappaluttullu assigiinngitsuummata, taakkunatigut ilumut naaperiarsinnaassanersugut pissanganalaarpoq.
AAMMA ATUARUK Partii Naleqqap peqataajunnaarnera tupaallaatigineqanngitsoq
Thomsen: piumasaqaativut aalajangiusimavagut
Isumaqatigiinnialissagunili piumasaqaatini aalajangiusimaniarpai:
- Qineqqusaarnermi kingullermi qineqqusaarutigisimasatta ilaat, imikkut pingaarutilittut taasavut, pingaarluinnartutut isigalugit qinersereernermi isumaqatigiinniarnermi tikkuaqqissimavagut. Siumup taakkua inooqataaffigisinnaanagit taamanikkut nalilernikuuai. Pissutsit taakkua allanngornatik inissisimaannarsimappata, taava Siumukkullu oqaloqatigiissutissaqanngitsugut isumaqarpunga. Kisianni Siumut oqarpat, uagut immikkut pingaartitavut,aamma namminneq inooqataaffigilersinnaalersimallugit, taava oqaloqatigiinnissaq tunngavissaqalersimassaaq.
AAMMA ATUARUK Naak politikkikkut sammiveqanngittoqaraluartoq Løkkep ataatsimeeqatiginissaa piviusunngussaaq
Ilinniartitaaneq inuussuutissarsiornerlu assersuutigai.
- Innuttaasut amerlanernik aningaasaateqartariaqarput. Suliffeqarfiit ineriartortitseqqissinnaassagunik aningaasanik namminneq pilersissimasaminnik aamma amerlanermik peqartariaqarput, Demokraatit siulittaasuat Niels Thomsen oqarpoq.
AAMMA ATUARUK Kielsen naalakkersuisooqatigiinnik nutaanik pilersitsiniassasoq
