Partii Naleqqap peqataajunnaarnera tupaallaatigineqanngitsoq
Partii Naleqqap qaammatit sisamat ullullu tallimat naalakkersuisooqataareerlutik peqataajunnaarnertik sapaammi ualikkut nalunaarutigaat.
Kim Kielsenip mittarfissualiornissamut danskit aningaasaleeqataasinnaaneranut ataasinngornermi ataatsimeeqateqarniarnera, Partii Naleqqap akuersaanngilaa.
AAMMA ATUARUK Kielsen naalakkersuisooqatigiinnik nutaanik pilersitsiniassasoq
Pisoq tupaallannanngitsoq, Atassummi siulittaasoq Siverth K. Heilmann oqarpoq:
- Tupaallaatigivallaanngilara, tusagassiorfiit aqqutigalugit tutsiuteqattaarnerat siorasaarerpaluttumik nipeqartarnerat, soorunami uggornarpoq. Naalakkersuisoqatigiittut isumaqatigiissimalluta piffissap taama sivikitsigisup iluani tunuarumallutik nalunaaruteqarmata aamma tamanna attaqqiinnartariaqarpoq namminneq aalajangigarimmassuk.
Ataatsimiikulannginneq ilaatigut peqqutaasoq
Naalakkersuisoqatigiinni partiit siuttuisa ataatsimiikulannginnerat, Atassummi siulittaasup ilaatigut Partii Naleqqap peqataajunnaarneranut peqqutigitippaa.
- Tunngaviatigut immaqa ilisimatitseqatigiittarnerit akulikinnerusinnaapput. Soorunami oqaloqatigiilaartarpugut telefonikkut assigiinngitsutigut. Soorlu partiit siuttui eqqarsaatiginerullugit taanna akulikinnerusinnaagaluarpoq,))
Nunatta Qitornaani siulittaasup aamma pisoq tupaallaatiginngilaa.
AAMMA ATUARUK Partii Naleraq Naalakkersuisooqatigiinnit peqataajunnaartoq
- Tupaallannanngilaq. Oqariartuutitik piffissaq kingulleq takutereernikuuaat. Assersuutigalugu mittarfissualiornissamut danskit aningaasaleeqataasinnaanerat pillugu isumaqataanatik oqaatigereernikuuvaat, Vittus Qujaukitsoq oqarpoq.
Inatsisartut ukiami ataatsimiinnissaat aallartitsinnagu nutaanik naalakkersuisoqatigiiliorsinnaanermut periarfissanik misissuiniarluni, Naalakkersuisuni siulittaasup sapaammi unnukkut nalunaarutigaa.
