Partiit: Qeqqualeriniartut ajornannginnerusumik taperneqarnissamut qinnuteqarsinnaassapput
Qeqqussanik tunisassiulerniarnissamut sumi qanorlu taperneqarnissamut aallartisarnissamullu ilitsersuutit pillugit qulartoqassanngilaq.
Inatsisartuni partiit Partii Naleqqamit inatsisissatut siunnersuut marlunngornermi oqallisigimmassuk isumaqatigiissutigaat.
- Suut tapersiissutaasinnaanerat tapiissuteqarnissamullu periarfissat pillugit ilisimasaqanngitsoqangaatsiarpoq, Nuummiillu ungasinnerusumikkaanni suli annikinnerusumik ilisimaneqartarlutik. Tassungalu tunngatillugu paasissutissiisoqarnerusariaqartoq isumaqarpugut, Siumumit, Henrik Fleischer oqallinnermi ilaatigut oqarpoq.
AAMMA ATUARUK Partii: Qeqqussanit periarfissat atorluarneqassapput
Partii Naleqqamit Hans Enoksenip aallarnisaaniartut taperneqarnissamut periarfissaata ajornartorsiutaanera aamma eqqaavaa.
- Taperneqarnissamut matorpassuit aqqutigineqaqqaartariaqarput. Tapersiisoqarnissaa ilungersunangaarmat inuit unittoortarput. Tamanna allanngortinneqartariaqarpoq, taanna oqarpoq.
Naalakkersuisoq: Suliniutit aallartisarneqarput
Naalakkersuisut qeqqussanik tunisassiulernissamut periarfissanik annerusumik nassuiaasiornissaat Partii Naleqqap siunnersuutigaa.
Siunnersuulli Naalakkersuisunit taperserneqanngilaq. Inuussutissarsiornermut aatsitassaqarnermullu naalakkersuisup, Jens Frederik Nielsenip suliniutit aallartisarneqareersut akissuteqarnermini innersuussutigai.
Assersuutigalugu Innovation Greenlandimut tapersiinermi aaqqissuussineq pilersaarutillu annerusut Pinngortitaleriffiup Royal Greenlandillu aallartitai.
AAMMA ATUARUK Nunatsinni qeqqussat ilisimatusarfigineqartut
Tapersiisoqarnissaatalu ilungersunarnera aamma suliaasoq ilisimaneqartoq, Jens Frederik Nielsenip oqallinnermi oqaatigaa.
- Nalunngilarput, ajornannginnerulersinniarsaraarpullu. Innovation Greenlandimi periarfissanik pitsaanerusunik aamma pilersitsiniartoqarpoq.
Taassuma Inatsisartuni amerlanerussuteqartut inatsisissatut siunnersuut ataatsimiiititaliamit isumagineqarnissaa taperseraat paasivaa. Ilisimasaqarnerulernissaq pikkoriissaarnerillu pillugit aaqqissuusseqqinnermik suliaqartoqarpoq, taanna oqaaseqartarfimmit oqarpoq.
Inatsisissatut siunnersuut novembarip ulluisa 17-ianni aappassaaneerneqassaaq. Tamatuma pinnginnerani inuussutissarsiuteqarnermut ataatsimiititaliap oqallisigissavaa.