Partii: Qeqqussanit periarfissat atorluarneqassapput
Nunatta sineriaani aningaasarsiornissamut periarfissat immap naqqaniittut misissorluarnissaat nalissaqarpoq.
Partii Naleraq taama isumaqarpoq. Partiip immap naasui soorlu qeqqussat tunisassiornermut annerusumut atorneqarsinnaanerat Naalakkersuisunit misissortikkusuppai.
Qeqqussallu Inatsisartut ullumi ukiakkut ataatsimiinnerminni inatsisissatut siunnersuutini oqallisigisassaannut ilaapput.
AAMMA ATUARUK Nunatsinni qeqqussat ilisimatusarfigineqartut
Partiip qeqqussanik tunisassiornerup pilersinnissaanut annertusarnissaanullu tunngatillugu misileraanernut nassuiaateqartoqarnissaa siunnersuutigaa. Nassuiaammi kommuninit inuussutissarsiornermiillu misilittakkat ilaatigut tunngavigineqassasut, inatsisissatut siunnersuummi allassimavoq.
Qeqqussanit periarfissatsialak
- Immap naasuinik tunisassiorneq, illoqarfinnut minnerusunut, nunaqarfinnullu tulluuttuuvoq periarfissaq pitsassuaq, suliffissaqartitsinikkut, aningaasarsiornikkut siuariartornikkullu, partii siunnersuuteqarnermi tunngavilersuilluni ilaatigut allappoq.
AAMMA ATUARUK Royal Greenland Maniitsumi nammineq naatitaminit qeqquartartartoq
Partii Naleraq qeqqussanit periarfissamik kisimiilluni ilimaginnittuunngilaq. Aamma Royal Greenland misileraalluni naatitsillunilu qeqquartarpoq. Suliffeqarfiup naatitaminit aasaq manna uisuitsutai sulluitsutaalu 900 kiilut missiliorpaat.