Royal Greenland Maniitsumi nammineq naatitaminit qeqquartartartoq
Qeqqussat allunaasani immamut inissitani naatitat erfalarujoortullu nakkutigineqartariaqartanngillat. Royal Greenland qeqqussanik naatitsivimmik immikkuullarissumik Maniitsup avataani pilersitsisimavoq. Suliffeqarfiummi naatitaminit aasaq manna uisuitsutai sulluitsutaalu 900 kiilut missiliorpaat.
Suliffeqarfiup nammineq naatitanit qeqquartarnermik misileraaneq ukiup aappassaanik ingerlappaa. Nikoline Ziemer misileraanermi ingerlatsisuuvoq. Taanna Royal Greenlandip tunisassiassanik inerisaaviani ingerlatsisutut atorfiliusoq suliniummut misileeraaffiusumut isumalluartupilussuuvoq.
- Qeqqussanik nerineqarsinnaasunik naatitsineq isumalluarnartoqarsorigatsigu taakkuninnga naaatitsisarpugut. Piumaneqarluarlutillu Europami USA-milu niuerfiit nioqqutigineruleraluttuinnarpaat, Nikoline Ziemer oqarpoq.
Qeqqussat inerinnikut kingunissaat siaruarternerisigut naatinneqartarput. Taakku Nikoline Ziemerip immamit qeqquartarai, taakkualu kingunissaat illup iluani allunaasanut siaruarternerisigut naatinneqartarput. Naatinnissaannut sapaatit akunnerini tallimani uninngatinneqaqqaartarput. Allunaasallu Royal Greenlandip qeqqussanik naatitsivianut tamatuma kingorna inissinnerisigut naatinneqartarput. Qaammatit arfineq-pingasut qaangiukkaangata qeqquartartoqarsinnaanngortarpoq.
- Nunami naatitanut eqqaanarput. Assersuutigalugu jordbærip qalipaa mikisuaqqanik kingunissaqarpoq. Taakkua siaruarternerisigut naatissinnaavatit. Qeqqussanik taamatorluinnaq aamma iliornikkut naatitsisinnaavutit. Qeqqussat kingunissaat allunaasanut siaruarternerisigut naatiinnartussaavatit, Nikoline Ziemer oqarpoq.
900 kiiluniit 1000 tonsinut
Nikoline Ziemerip qeqqussanik nammineq naatitanik niueruteqalernissaq pissanganartortaqarsoraa. Nammineq naatitanit qeqquartatik Royal Greenlandip aningaasaliinerusalerneratigut ukiumut 900 kiiluniit ukiut tallimat ingerlaneranni 1000 tonsinngorsinnaapput.
Royal Greenlandili nammineq naatitaminit qeqquartaminik amerlasuunik niueruteqartalinnginnermini massakkut naatitseriaatsiminit pitsaanerujussuarmik periuseqalertariaqarpoq. Taamaammat Nikoline Ziemerip norskit suliffeqarfiutaat qeqquarpassuarnik naatitseriaatsimik pilersitseqqammertoq, Arctic Seaweed, attavigisimavaa.
- Aningaasaliinerusalerusussappat ukiualuit ingerlaneranni 200 tonsit tungaannut qeqquartartalernissarput naatsorsuutigaara. Taakkualu ikigisassaanngitsukasiupput.
Suliffeqarfik qeqqussanik Europami niueruteqartalerusukkuni ukiumut 1000 tonsinik amerlanerusunilluunniit qeqquartartariaqarlertariaqarpoq, Nikoline Ziemer erseqqissaavoq.
- 1000 tonsinik ukiut tallimat ingerlaneranni qeqquartartalernissatta angunissaa sulissutigaara, suliffigali tamatumunnga aningaasaliinerorusussanersoq soorunami apeqqutaavoq, Nikoline Ziemer oqarpoq.
Qeqqussat vitamineqarluartut
Kisianni uisunnik sulluitsunillu tunisassiorneq sooruna aallukkusukkaat? Taakkua Nikoline Ziemerip oqarnera naapertorlugu peqqinnarlutillu pisariitsumik nerisassiarineqarsinnaapput, aamma naatitanut Europameersunut taartigineqarsinnaapput.
- Qeqqussat naatitanut allanut taartigineqartarput. Nunami naatitanit quleriaammik vitamineqarnerullutillu mineraleqarnerupput, aamma orsunik arrujasunik, tassa omega-3-mik omega-6-imillu akoqarput, taanna oqarpoq itisiliillunilu:
- Imermut qalattumut kinitsiariarlugit imermut nillertumut kinikkaanni aqilisarput, mikikkaannili sikattarlutik. Nalissaqanngeqaat.
Aalisarnermut, Piniarnermut Nunalerinermullu Naalakkersuisoqarfik, Inuussutissarsiornermut Naalakkersuisoqarfik, Royal Greenland aamma Nunatta Atuagaateqarfia qeqqussat pillugit aggustip ulluisa 29-anni saqqummiissapput. Tamanna qeqqussat kangerlummi nammineq naatinneqarneranniit nerisassiaralugit tunisassiarineqarnerat pillugit aaqqissuussinermi pissaaq. Aaqqissuussineq Nuummi Nunatta Atuagaateqarfiani nalunaaqutaq ullup qeqqaniit pingasut tungaannut pissaaq.
