Partiit: Inussiarnersuuneq naammanngilaq
Partii Naleqqamit piumasarineqarpoq, Qaqortumi mittarfiliornissaq tunulliuteriarlugu Kujataani suliffissaaleqinerujussuaq inissaaleqinerujussarlu suleqatigiissutigineqarsinnaasut.
Aningaasat suliffissaaleqinerup akiorniarneqarneranut atorneqarlik
Tamannalu pillugu Partii Naleqqap siulittaasua, Hans Enoksen ima oqarpoq.
- Kujataani suliffissaaleqisorpassuaqarpoq. Qaqortumi mittarfiliornissap kingunerisussaavaa sanaartornermut aningaasaliissutit 400 millionit koruunik ilanngarneqarnissaat. Uagut pilerinartinneruarput aningaasat taakku suliffissaaleqinerup inissaaleqinerullu akiorniarneqarnerannut atorneqarpata, Hans Enoksen oqarpoq.
Inussiarnersuuneq naammanngilaq
Siumumi nutaamik siulittaasoqalernera Demokraatit isumaannik imatorsuaq allanngortitsinngilaq. Andreas Uldum oqarpoq suleqatigiinnerni partiip siulittaasuata inussiarnernera pitsaasumik suleqatigiilernermik tamatigut kinguneqarneq-ajortoq.
- Siumut nutaamik siulittaasortaarpoq taassumali partiimi tunuliaqutini aamma eqqarsaatigisussaavai, tassami Inatsisartunut qinersinerup kingorna inuit nutaat takkuttussaapput tassaavorlu taakku suleqatigineqartussat isumaqatigiinniarfigineqartussalllu. Taamaammat suleqatigiilluarnissamik ujartuineq maannakkuugallartoq akiuminaappoq.
Siumut isigisumik isummersinnaassuseqartariaqartoq
Andreas Uldumilli Kim Kielsen isummersullaqqinnerarpaa, taamaakkaluartorli inuiaqatigiinni pissutsit allanngortinneqarnissaat eqqarsaatigalugu siumut isigisumik isummersinnaassuseqartariaqartoq neriuutigalugu, Andreas Uldumip oqaatigaa.
- Tamassuma timitalerneqarnissaa takorusuppara aamma qilanaaraara oqaloqatigiittaqattaarnissaput. Partiit tamaasa suleqatiginissaannut piareersimavugut. Tamannali qinersinerup kingunerata takutikkumaarpaa qanoq periarfissinneqarnissarput, Andreas Uldum ioqarpoq.
Innuttaasut oqaloqataatinneqarlik
Inuiaqatigiinnut tusarnaarsinnaaneq Siumup siulittaasortaavata pikkoriffigisariaqarpaa, Partii Naleraq tamakkiisumik Siumumik suleqateqassappat, Hans Enoksen oqarpoq.
- Urani pillugu Inatsisartuni isummersitsisoqalermat Siumut oqarpoq tamanna ataatsimiititaliamiluunniit suliarineqartariaqanngitsoq. Taama ingerlariaqqittoqassappat tamanna akuerinavianngilarput tassami innuttaasut oqaloqataatinneqarlutillu akisussaaqataatinneqartariaqarmata. Tassami tamanna taama imaannaanngitsigisoq politikerinit taamaallaat aalajangerneqarsinnaanngilaq, partii Naleqqap siulittaasua, Hans Enoksen taama oqarpoq.
