Inatsisartut ukiakkut ataatsimiinnerat Partiit inatsisissatut siunnersuutinik 71-inik nassiussaqartut
Partiit ukiaq manna siunnersuutigisassaat assigiinngisitaaqaat, tamanna KNR-ip misissuinerata takutippaa: Ilaatigut tassaallutik inatsit tunngaviusoq nutaaq, illersornissamik isumaqatigiissutip allanngortinneqarnissaa kiisalu Nunatsinni Danmarkimilu ilinniagaqartut atugaasa pitsanngorsarneqarnissaat.
Siumumit ilisimatitsissutigineqarpoq siunnersuutit 15-it Inatsisartuni suliassanngorlugit nassiunneqarsimasut, Atassullu allannguutissatut siunnersuutinik arfiniliinnarnik nassiussisimavoq.
Parti Naleraq siunnersuutinik qulingiluanik nassiussaqarsimavoq Demokraatillu tallimaannarnik, Inuit Ataqatigiillu allannguutissatut siunnersuutinik 27-rsuarnik nassiussisimapput. IA aamma siunnersuutiminik upernaakkut ataatsimiinnermi angumerineqanngitsoortunik qulingiluaasunik nassiusseqqissimavoq.
Inatsit tunngaviusoq nutaaq
Siumut aamma Parti Naleraq isumalioqatigiissitamik kalaallit tunngaviusumik inatsisitaarnissaat pillugu isummersuiffiussamik pilersinitsinissamik siunnersuuteqarput.
Nunatsinni Danmarkimilu ilinniagallit pitsaanerusunik atugassaqartinnissaasa saniatigut Inuit Ataqatigiit siunnersuutigisaasa pingaarnersaat tassaaavoq illersornissamik isumaqatigiissutip allanngortinneqarnissaanik siunnersuut. Parti Naleraq assingusumik aamma siunnersuuteqarpoq.
Demokraatit ilinniartitaanerup aaqqissugaanera misissortikkusuppaat, Atassutillu - allaanerusumik siunnersuuteqarlutik - Nunatsinni kikkulluunniit najugaqartut, pisortani atorfeqartup maanaannaq suliunnaarluni aallarnerani utaqqiisaasumik inissiamik pisiniassaminnut periarfissaqarnissaat kissaatigaa.
Inatsisartut suleriaasiata allanngortinneqarneratigut, partiit apeqquteqaat aallaavigalugu oqallinnissamik siunnersuutissaminnik inatsisissatut siunnersuutit nassiunneqarfissaat nalerorlugu Siulittaasoqarfimmut nasiussisaqariaarupput. Partiit Inatsisartut ataatsimiinnerisa nalaanni taakku maanna nassiussinnaalerpaat.
