"Partiit ataatsimiittarfiginngikkaat nalunngilara kisiat..."
Partiimi oqaaseqartup oqalugiaatimi naammassereernerata kingorna parteeqatip maannakkut aperisinnaajunnaarpaa.
Malittarisassalli allanngornerat inatsisartuni ilaasortap ataatsip ingammik isornartorsiorpaa.
- Partiimut qanorluunniit ilaasortaatigigaluaraanni imaanngilaq tamatigorluinnaq isumaqatigineqassasut. Killeqanngitsumik oqaaseqarsinnaatitaaneq annikilliartuinnarpoq, oqallittarneq soqutaajunnaariartuinnarpoq. Uggornaraluartumik uatsinnut killilersungaaratta massakkulluunniit uagutsinnut aperisinnaajunnarpugut, inatsisartuni ilaasortaq Partii Naleraqqamilu siulittaasoq Hans Enoksen oqarpoq.
Hans Enoksen Siumumi ilaasortaanermi nalaani Inatsisartut ataatsimiinneranni partiini isornartorsiortarnikuuaa.
Partiinut ataatsimiiffiunngitsoq
Parteeqatit aperisinnaajunnaarneranut piumasaqaatit nutaat pisinnaatitaaffinnik innarliisinnaaneranut oqariartuut inatsisartuni siulittaasup Lars-Emil Johansenip isumaqatiginngilaa.
- Kikkulluunniit parteeqatiminnut aperinissaminnut periarfissaqarput. Taamaallaat gruppertarfimmini tamanna naammassissagaat naatsersuutigisariaqarpoq, Lars-Emil Johansen oqarpoq.
Hans Enoksenilli inatsisartut ataatsimiittarfimmi oqarsinnaatitaanerat pingaartilluinnarpaa.
- Inatsisartuni ataatsimiiffik partiit ataatsimiittarferinngikkaat nalunngilara. Kisianni uanga inatsisitigut illersugaavunga namminiissuteqarlunga, tappikani inersuarmi oqaaseqarsinnaallunga, partiimulluunniit ilaasortaagaluaruma. Taanna aamma ataqqineqartariaqarpoq, Hans Enoksen oqarpoq.
Sivitsornerit
Partiit oqaaseqartartuisa oqalugiaatitik naammassereernerata kingorna, parteeqatit nersualaarinnittartut ataatsimiinnerni takussaagajuppoq, soorlu aamma ataatsimiinnerit piffissamik qaangiisarnerat qaqutigoortuunani, taakkulu malittarisassanut nutaanut aamma pissutaaqataapput.
- Pisariaqarnera sinnerlugu sivitsorsaanertut isumaqarfigigatsigu. Parteeqatigiit apersornermut annertuumik atortarmassuk, Lars-Emil Johansen oqarpoq.
