Partiit arnanik naalakkersuinermik suliaqarusuttunik amigaateqarput
Siumut arnanik qinigassanngortitakinnerpaanut ilaavoq. Siumullu taaguunneqarluarnissaa Inatsisartuniititaqarluarnissaalu naatsorsuutigineqarmat Inatsisartuni angutit arnanit amerlanerusinnaapput.
Arnat 15-iinnaat Siumumi qinigassanngortipput - angutit 59-it qinigassanngortittut.
Siumut sinnerlugu Inatsisartunut ilaasortaq, Jess Svane, naapertorlugu partiimi suliat oqimaannerusut ukkatarineqarnerat pissutaalluni Siumut angutinit soqutigineqarneruvoq.
AAMMA ATUARUK Arnat Inatsisartunut qinigassanngortittut angutinit ikinnerungaatsiartut
- Siumup tunngaviusumik politikkia annertoorujussuarmik ilaatigut imaqarpoq inuussutissarsiutitigut oqimaattunik suliaqarfiusunik. Taakkuuppullu angutit amerlanerpaartaasa immaqa soqutigisaat, Jess Svane oqarpoq.
Siumumili aamma isumaginninneq sammisaramikku, tamanna pineqaleraangat arnat oqalliseqataalluartartut, taassuma erseqqissaatigaa:
- Arnartatta soqutigisaat, soorlu angerlarsimaffik peqqissoq, toqqissisimasoq, taavalu aamma isumaginninnikkut ulluinnarni pissutsit pulaffigalugit qanoq eqqartorneqarsinnaanerannik soqutiginninneq annertunerujussuuvoq.
Arnanilli amerlanerusunik qinigassanngortitsinissaq aallutarigitsik, Jess Svane oqarpoq.
- Sumiiffinni oqartussaanermik suliniarnermi arnat peqataanerunissaat aamma kaammattuutigiuarparput, tassuunakkut arnanik amerlanerusunik pissarsinissaq siunertaralugu.
AAMMA ATUARUK Qinigassanngortittut pingasorarterutaannaat arnaasut
Inuit Ataqatigiit sinnerlugit sassartut 45 procentii arnaapput, arnallu sassartut amerlanerannut partiip naleqartitai pissutaasut, Bent B. Kristiansen isumaqarpoq:
- Arnat angutillu nalingiinnerusumik inissisimanissaannik oqariartuuteqartarnerput, ukiorpassuarnilu taamatut politikkeqarnerput, tunngaviusutut isigisarparput arnat taama amerlatigisut partiitsinnut orniguttarmata, Inuit Ataqatigiinneersoq Bent B. Kristiansen oqarpoq.
Arnallu amerlanerusut qinigaappata pitsaaqutissartaqartoq erseqqissaavoq:
- Upperilluinnarparput Inatsisartuni arnat massakkornit amerlanerusuuppata inuiaqatigiit pillugit naapeqatigiilluarsinnaaneruneq pitsaanerusumik isikkoqarsinnaassagaluarpoq.
Politikerillu inuiaqatigiit atugaat aallaavigalugit sulisussaasut, taanna oqarpoq.
- Taamaalilluni aamma arnat angutillu oqimaaqatigiittumik nalilersuisarnerat ersarinnerusumik takusaratsigu, aamma inatsisiliornikkut inuiaqatigiit atugaannut naapertuunnerusumik ilusilersuinerit angusinnaasarnikuugatsigu, Bent B. Kristiansen oqarpoq.
