Qinersineq Qinigassanngortittut pingasorarterutaannaat arnaasut
Apriilip 24-ani qinersisoqalerpat qinigassanngortittut allattorsimaffianni angutit qinigassat arnanut naleqqiullugit nassaariuminarnerussapput. Qinigassanngortittummi 2/3-iinnaat arnaapput sinnerilu 1/4-it angutaallutik.
AAMMA ATUARUK Arnat Inatsisartunut qinigassanngortittut angutinit ikinnerungaatsiartut
Siumumi qinigassanngortittunit 59-iusunit 25 procentit arnaapput.
Arnat Siumut tunuliaqutaralugu qinigassanngortittut 15-iusut ilagaat 28-nik ukiulik Paninnguaq Tarrak-Petrussen.
- Isumaqarpunga amerlanerusinnaasugut. Aamma neriuppunga siunissami amerlanerulerumaartugut, arnat, Paninguaq taama oqarpoq.
Politikeritullu siullerpaamik sassartup sapaatit akunneri marlussuit matuma siorna qinigassanngortinniarluni aalajangerami angutaaneq arnaanerluunniit eqqarsaatigisimannginnerarpaa:
- Eqqarsartuaannarnikuuvunga inuk allannguerusuttoq angutaagaluaruni arnaagaluaruniluunniit apeqqutaanani sassartartoq.
AAMMA ATUARUK Bedre forhold kan få kvinder ind i politik
Partiimi arnat angutillu amerlassutsimikkut agguataarsimanerat equngagaluartoq Paninnguup pitsaasortaa isiginiarneruaa.
- Torragivara 15-iugatta tallimaanata. Aamma nuannaarutigaara torragalugulu paasigakku amerliallassimasugut naggataatigut, Paninnguaq taama oqarpoq.
Arnaqatigiit oqaloqatigiillaqqittuupput
Arnat amerlanerusut politikkimik suliaqalernissaat pingaaruteqartutut isigaa, naligiissitaaneq eqqarsaatigalugu, allali aamma eqqaavaa:
- Kisianni aamma arnaalluni ilaannikkut iluartarami arnaqatinik isummersoqateqarneq, taamaammat aamma pingaaruteqarsorivara arnat siunissami sassartartut amerlanerulernissaat, Paninnguaq Tarrak-Petrussen taama oqarpoq.
Arnat amerlanerusut politikkimik suliaqalernissaannut ajornartorsiutaasoq inuiaqatigiinni isiginnittariaasitsinni naliginnaasutut isigaa.
- Eqqoriarsinnaavara inuiaqatigiinni isiginnittariaasitsinni immaqa isigisaripput politikki angutinoortoq. Kisianni uanga inuttut isummanni taamaannikuunngisaannarpoq.
Paninnguaq Tarrak-Petrussen arnaanermi saniatigut aamma naartuvoq, arnallumi kisimik naartusinnaapput. Tamannali uniffiginngilaa.
- Naamik, taamaallaat eqqarsaatiginikuuara neriussuataarlunga toqqaannartumik oqallinnerni peqataassagaluaruma sivisuumik nikorfallunga uppinnginnissara. Kisianni ulluinnarni aporfittut isiginngilara peqqillungalu nukissaqarluarama, taavalu naartunera nappaatitut isiginnginnakku, Paninnguaq Tarrak-Petrussen oqarpoq.
Partiit arlaannaalluunnit 46 procentit sinnerlugit arnartaqanngillat
Partiini allani pissutsit aamma taamaapput.
Partii Naleqqap qinigassanngortitai arnat arfineq-pingasuupput angutillu 27-t, Atassutillu qinigassanngortitai tassapput arnat pingasut angutillu 17-it.
IA-p Demokraatillu qinigassanngortitaat oqimaaqatigiinnerupput, angutilli suli amerlanerussuteqarlutik. Demokraatit qinigassanngortitaat tassaapput arnat 14-it angutillu 19-it. IA-p qinigassanngortitai tassaapput arnat 28-t angutilku 34-t.
Partiini nutaani marlunni angutit aamma amerlanerussuteqarput. Nunatta Qitornai arnanik pingasunik angutinillu aqqanilinnik qinigassanngortitsipput, Suleqatigiissitsisullu arnanik marlunnik angutinillu arfinilinnik qinigassanngortitsillutik.
AAMMA ATUARUK Arnat sassartut ikinnerupput
