Partiinut aningaasaliisartut saqqummiunneqartalissapput
![](/sites/default/files/styles/image_934x467/public/article_images/inatsisartut-2-630_5.jpg?itok=Gk28yu_0)
Siunnersuummik saqqummiussisuupput Demokraatit taakku isumaqaramik taamaasiornikkut suliffeqarfissuit aningaasaatillit nunatsinni oqallinnermut sunniuteqarpalaalinnginnissaat qulakkeerneqarsinnaasoq.
- Maannakkorpiaq suliffeqarfissuit nunanit tamalaaneersut assut soqutiginnipput, taamaattumik mianersorfigisariaqarparput taakku soqutigisaminnik partiit aqqutigalugit siusaaniarsinnaanerat. Nalunngilarput suliffeqarfissuit taakku aningaasaaterpassuaqartut aningaasallu taakku atornerlunneqarsinnaapput, Niels Thomsen Demokraatineersoq oqarpoq.
Demokraatillu politikkikkut oqaaseqartartuat inatsisissatut siunnersuummini tamakkiisumik tapersorneqarpoq siunnersuutillu malitsigisussaavaa nunatsinni partiit naatsorsuutaanni takuneqarsinnaalissasoq suliffeqarfiit aningaasanik tunniussisut atii adressiilu tassanilu ilaatinneqarput inuit ataasiakkaat 10.000 koruuninit amerlanerusunik tunniussaqartut.
- Siunnersuummut tapersuinitsinnut pisutaavoq tamaasiornissaq assortoruminaammat. Pissusissamisoorpoq ammasuunissaq tamannalu assortoruminaappoq. Avataaniit annertuumik aningaasaliiffigineqarneq ajorpugut annertuumik annikitsumilluunniit - kisianni pitsaasumik Socialdemokraatit suleqatigilluarpagut naak tamanna aningaasanngorlugu annertuuliutissaanngikkaluartoq, Siumup siulittaasua Aleqa Hammond oqarpoq.
Siumukkullu siorna naatsorsuutaat qiviaraanni takuneqarsinnaavoq avataaniit tapiissutit ikittuinnaasut. Partiimut tunissutit 4.900 koruuniupput isertitanit 2,7 millioner koruuninit taakkulu tassa ilaasortat akiliutaannit partiillu ikinngutaani pissarsiaapput. 17.000 koruunit allanneqarsimapput 'isertitat allat'-tut.
Aamma taamatorluinnaq ippoq partiit allat naatsorsuutaat qiviaraanni taakkunanimi takuneqarsinnaavoq isertitat amerlanersaat landskarsimeersuusut. Allaanerulaartutut taaneqarsinnaasutuaavoq Atassut, tassami taakku Danmarkimi suleqatigisaminnit Venstre-mit ukiumut 50.000 koruuninik tunissutisisarput. Ullumikkulli inatsit naapertorlugu suli takuneqarsinnaanngilaq aningaasatut tunissutitut allanneqarsimammata, taamaattoq siulittaasup Gerhardt Petersenip akornutissaqartinngilaa oqaluttuarissallugu aningaasat suminngaanniit pissarsiarineqarsimanersut.
Siunnersuummik saqqummiussisut Demokraatit siorna 1,5 millioner koruuninik naatsorsuuteqarsimapput taakkunanngalu 20.000 koruunit tunissutisiaallutik. Politikkikkut oqaaseqartartuat Niels Thomsen aamma oqarpoq ilimananngitsoq isertortumik soqutigisat ullumikkut siuarsarniarneqartartut.
- Taamaasiortoqassappat ammasumik pisariaqarpoq. Pasitsannarsinnaasumik pisoqalissaaq partii allatorluinnaq isummersulerpat. Qinersisartup qaqugukkulluunniit takusinnaasariaqarpaa partiip aamma inuiaqatigiinni allat soqutigisaat arlaatigut ataqatigiinnersut, Niels Thomsen oqarpoq.
Siunnersuut maanna Inatsisartut inatsiseqarnermut ataatsimiititaliaanni suliarineqassaaq tassanilu ilaatigut isummersorfigineqassaaq inatsisissatut siunnersuut immikkut allassimassanersoq imaluunniit politikkikkut suliniarneq pillugu inatsimmut tapiliunneqassanersoq.
Danmarkimi inatsit maanna pineqartumut assiguvoq tassamanili inuit ataasiakkaat tunissutaat 20.000 koruuninit amerlanerugaangata saqqummiunneqartarput nunatsinni inatsisissatut siunnersuutigineqartup marloriaataanik amerlassusillit.
Partiit allat naatsorsuutaat eqqarsaatigalugit Inuit Ataqatigiiit siorna 26.650 koruuninik tunissutisipput naatsorsuutit malillugit isertitanit 3,4 millioner koruuniusunit. Kattusseqatigiilli partiiat koruuninnguamiilluunniit tunissutisisimanngilaq. Partii taanna Inatsisartuni ilaasortaatitaqartuni isertitakinnersaavoq 800.000 koruuninik isertitsisarami.
Og for en god ordens skyld kan vi lige nævne de sidste partier: nemlig Inuit Ataqatigiit, der sidste år modtog samlet 26.650 kroner i et budget med 3,4 millioner kroner i indtægter, mens Kattusseqatigiit Partiiat ikke har fået så meget som en krone fra private støtter. Partiet har som det mindste i Inatsisartut et årligt budget på omkring 800.000 kroner.