Partii nutaaq qineqqusaalersoq
Partii pilersinneqartoq UNP-mik taaguuteqassaaq. Partiili taanna suli pisortatigoortuunngilaq, tallimanngorpammi aatsaat pisortatigoortumik pilersinneqassagami. Jørgen Chemnitz assiliisartuullunilu tusagasiortuusoq aammalu inuiaqatigiinni pissutsinik sammisaqarluni allaaserinnittartuullunilu atuakkanik saqqummersitsisimasup, partiip taaguutaata naalisarneqarnera UNP partiip pilersinneqarnerani aatsaat saqqummiunniarpaa.
Partiimik pilersitsissagaanni kingullermik inatsisartunut qinersisoqarmat qinersisut 1/31-liisa amerlaqataannik atsiornernik katerseqqaartoqartussaavoq. Partii UNP taamaalilluni novembarip 28-ani qinigassanngortitsissaguni atsiornerit 964-it katersoqqaartariaqassavai.
Atsiornernik katersisussanngorpoq
Atsiornernillu pisariaqartunik 964-iusunik katersineq partiip nutaap ataasinngorpat aallartinniarpaa. Partii atsiornernik katersinissaminut sapaatit akunnerinik pingasunik periarfissaqarpoq.
Pilersitsisorlu isumalluarpoq.
- Angumerissaqqaarparput, UNP-mik pilersitsisoq, Jørgen Chemnitz, KNR-imut taama oqarpoq.
UNP-p pisortatigoortumik qinnuteqaataa Inatsisartunit Namminersorlutik Oqartussanillu tiguneqareerpoq. Atsiornernillu katersinissaq maanna amigaataaginnalerpoq.
Inuiannullu oqalugiaqqaarnera Facebookimi takuneqarsinnaavoq. Qineqqusaarneratalu quiasaarnermik imaqarluarnissaa ilimanarluinnarpoq, oqalugiaatiminimi nutsat qanoq isikkoqarnissaat aammalu qallunaatut oqalunnissaq qanoq pingaaruteqartiginersoq ilaatigut oqaatigaa.
