Partii Naleraq: Mersortarfiup ingerlaannarnissaa sulissutigineqartariaqarpoq
- Ukiuni makkunani suliffissanik pisariaqartitsinerput annertoqaaq, pingaartumik aamma nunatta kujataa eqqarsaatigalugu. Taamaattumik akuersaarneqarsinnaanngilaq Nunatta ammeriviata mersortarfia sipaarniarnikkut matuniarneqarmat, Partii Naleqqap siulittaasua Hans Enoksen taama oqarpoq.
Aamma atuaruk Puisit amiinik kavaajaliat oqaluttuaannanngussapput
Suliffissaqartitsiniarneq Nunatsinni pingaartillgu sulissutigineqartariaqartoq taassuma oqaatigaa:
- Nunatsinni imminut pilersornerunissarput aammalu avammut niuerutigisinnaasatta annertusartuarnissaat suliniutigiuartariaqarpoq pingaartumik aamma inuiaassutsitsinnut immikkuullarissumik ilisarnaatigut tassalu puisit amii avammut nittarsaattuartariaqarpagut, aammalu atuinikkut nioqqutissiornikkullu siuarsartuarnerisigut, Hans Enoksen tusagassiuutinut taama ilaatigut allaaserisaqarpoq.
Suliffeqarnikkut Nunatsinni annertusaajuartoqartariaqartoq Partii Naleqqap oqaatigaa, ammeriviullu mersortarfiata ammaannarnissaa kommuni suleqatigalugu sulissutigineqartariaqartoq oqaatigalugu.
- Partii Naleqqamiit Naalakkersuisut piumaffiginiarpagut isumaqarluinnaratta mersortarfiup matunissaa pinngitsoornagu aningaasaliinissaq aqqutissiuttariaqaraat kommuni peqatigalugu, Partii Naleqqap siulittaasua Hans Enoksen oqarpoq.
