Papua Ny Guineami nuna sisoormat inuit 2000-nit ikinnerunngitsut matoorussaasut
Papua Ny Guineami nuna tallimanngormat sisoormat inuit 2000-nit ikinnerunngitsut matoorussaasimasut, Naalagaaffiit Peqatigiit ullumi ataasinngornermi ilisimatitsissutigaat.
Papua Ny Guineap ajunaarnersuaqartillugu ataqatigiissaarisoqarfiata, Naalagaaffiit Peqatigiit Papua Ny Guineami illoqarfiit pingaarnersaanni Port Moresbymi allaffeqarfiannut allaaserisaani tamanna takuneqarsinnaavoq. Nutaarsiassaqartitsivik AFP allakkat aallaavigalugit taama allappoq.
- Nuna sisoormat inuit 2000-t sinnerlugit matoorussaapput, aseruatitertoqangaatsiarporlu, Papua Ny Guineap ajunaarnersuaqartillugu ataqatigiissaarisoqarfia allappoq.
Nuna kigaatsumik suli sisoorpoq, annaassiniartartut sulinerat ajornakusoortilerlugu, aniguisunullumi aamma.
Papua Ny Guineami nunap immikkoortuani Engami nuna tallimanngormat ullaakkut nalunaaquttap tallimat missaanni sisoorpoq. Nunap immikkoortua Enga, Papua Ny Guineap illoqarfiisa pingaarnersaannit Port Moresbymit avannamut 600 kilometeritut ungasitsigisumiippoq.
Naalagaaffiit Peqatigiit qimaasut pillugit aqutsisoqarfiata IOM-ip Papua Ny Guineami allattoqarfiata oqarnera naapertorlugu inuit 1250-it missaat nunap immikkoortuani Engami angerlarsimaffitik qimattariaqarsimaavaat.
Taama ajunaarnersuaqarnera pissutaalluni kikkulluunniit ikiuussinnaasut suleqatigiillutik ikiuisariaqartut, Papua Ny Guineap ajunaarnersuaqartillugu ataqatigiissaarisoqarfiata piumasaraa.
Naalagaaffiit Peqatigiit Papua Ny Guineami pissutsit pillugit Papua Ny Guineap ineriartortitsinermut suleqatigisaanut ilisimatitsissuteqartariaqartut, Papua Ny Guineap ajunaarnersuaqartillugu ataqatigiissaarisoqarfia kajumissaarivoq.
