Palle Jerimiassen qinigaaffiup tullianit sulinngiffeqarusuppoq
Avannaata Kommuniani borgmesteri, Demokraatineersoq, Palle Jerimiassen, sooq politikkimit tunualernerluni KNR-mut sisamanngornermi itisiliiumanngitsoq, maanna nassuiaateqarpoq.
KNR-immi taassuma politikkimit tunualernera pillugu sisamanngornermi allaaserisaa, nassuiaateqapallannissamut tunngaviliisoq borgmesteri naliliivoq.
Tassalu politikkimit tunuavilinngitsoq maanna paasinarsivoq. Borgmesteri, kommunalbestyrelse nutaassaq ivertinneqareerpat kommunimut ilaasortanngoqqissaaq. Inissitsiterlunili ataatsimiinnissami ukiumi ataatsimi sulinngiffeqarusulluni kommunalbestyrelsissamut qinnutigissavaa.
- Ukiup affaa kingulleq immaqaluunniit sinnilaarlugu timinni assigiinngitsunik malussartalernikuugama, siornatigut malugisarsimanngisannik, napparsimaruluttaqattaarlungalu.
- Taava paasivara kingusinnerusukkut timima qasoqqanera, immaqalu tarnikkut qasoqqanera, oqariartuutigisarsimagaa, Palle Jerimiassen KNR-mut oqarpoq.
Nangaasimasoq
Taassuma ukioq ataaseq qaangiuppat peqqissutsi qanoq innersoq apeqqutaatillugu sulinngiffeqarnini nangissanerlugu atuuffissaminulluunniit uteqqissanerluni aalajangissavaa.
Peqqinngittarnini qineqqusaarnerup nalaani qaangissallugu neriuutigisimagaluarlugu oqarpoq. Taamaammat qineqqusaaqqinniarluni borgmesterinngoqqikkusukkaluarlunilu sassarpoq.
- Qineqqusaarnissara assut nangaassutiginikuugaluarakku. Kisianni neriukkaluarama qineqqusaarnerup nalaani peqqississallunga, kisianni taamaalinngitsoorama, Palle Jerimiassen oqarpoq.
Borgmesteri: Uannut pisarissuunga
Maannalumi tassa qinigaaqqikkaluarpoq. Qinigaalluarlunili borgmesterinngoqqittussatut inissikkaluaruni tamanna aamma atussanagu qineqqusaarneq aallartereersoq aalajangereersimallugu aamma oqarpoq.
- Qineqqusaarneq aallartimmat borgmesteritut inisseqqissinnaanissara aamma siunnerfiginikuuara. Kisianni qineqqusaarnerup nalaani toqqissinanga ilungersuanikuugama qineqqusaarnermut ilaaniarsaralunga, tassanili aalajangernikuuvunga naamik borgmesteritut ingerlaqqinniaruma uannut, qanoq oqassuunga, uannut pisariinnartussaallunga, Palle Jerimiassen oqarpoq.
Qamuteralallunilu umiatsiassasoq
Taassuma ukioq ataaseq sulinngiffeqarnissani kommunalbestyrelsinngortussamit akuerineqassappat arlaanni atorfininnissani qanittukkut pissasoq naatsorsuutiginngilaa. Nukittorsarnerminili suliassaqarpoq.
- Nuannarisarigakku avatangiisinik atuineq. Ukiukkut snescooterit, avatangiisini pisunneq, aasakkut umiatsiarluni, illuaqqamiilluni avatangiisit atorlugit. Taanna annertuumik atorniarpara, taanna oqarpoq.
73-it
Qinersineq.gl naapertorlugu Niels Erik Bro sinniisussatut siullertut inissisimavoq. Tullersortaasorli Inuutersuaq Ulloriaq Løvstrøm, aappamituulli 73-init qinerneqarpoq. Taamaattumik sinniisussanik makitsisoqassasoq naatsorsuutaasinnaavoq.
Palle Jerimiassen marlunngornermi qinersinermi 104-nik qinersiseqarpoq. Taakkua pingasoriaataat sinnerlugu 2021-imi qinersisigigaluarpai.
