Palle: Immikkut atuartinneqartartut amerlavallaaqaat

Ilinniartitaanermut Naalakkersuisoq Palle Christiansen ima isumaqarpoq:

- Ukiumut atuarfiusumut 2010/2011-imut atuartut 2046-it immikkut atuartinneqartarput. Atuartut tamaasa eqqarsaatigalugit 20 procentiinik amerlanerupput 2002-millu 100 procentinik amerlanernik qaffariarnerulluni. Nunatsinni tamatumunnga akisussaasoq qanormita tamatumunnga isumaqarpa?
Amerlavallaaqaat, tassami atuaqatigiinni taama amerlatigisut immikkut atuartinneqartassappata periaatsit ilaat nutaamik nalilersortariaqarpavut.

Immikkut atuartitsisarneq pillugu Namminersorlutik Oqartussat nalilersuinissamut piareeqqasut Palle Christiansenip aamma oqaatigaa, soorluttaaq aningaasaliissutaasartut ukiumut 60 mio. koruunit qanoq pissarsissutaatigisarnerat paasiniarlugu paasiniarneqassasoq oqaatigalugu.

Sapaatip akunnerata siuliani kisitsisit qaffasissut eqqartukkavut meeqqat kikkut sumi atuartinneqassanersut pillugit kommunip naammanngitsumik misissuisarsimaneranik tunngaveqartoq Naalakkersuisoq isumaqarpoq.

Meeqqat kikkut sumi atuartinneqartassanersut misissuinermi ima immitsinnut aperisarnerusariaqarpugut: Ulluinnarni atuartitsinermi sulinerulaarsinnaanngilagut amerlanernillu atuartitsilluta, ajornartorsiortoqalaalersorlu oqaannaqinata:

- Immikkut illit atuartinneqassaatit. Taamatut periaaseqartarnermi naammanngitsunik tunngavissaqarluni aalajangiisoqartarsimanera ilimagaara, Palle Christiansen oqarpoq.

Perorsaanermut tarnillu pissusai pillugit siunnersuisarneq Namminersorlutik Oqartussat maanna akilertarpaat kiisalu annertusisamik immikkut ilinniartitsineq ilanngullugu, taannalu akisuvoq.

Ukiortaamilli kommunit tamanna akisussaaffigilissagaat pilersaarutaasoq oqaatigaa, tamatumalu kisitsisit allanngortissagai qularinagu.

Illuatungeriinni marluusuni sullissinissamik isumaqatigiittoqartillugu illuatungiusup qanoq akiliisoqartigissanersoq aalajangiisoqartartillugu akikinnerpaaq toqqarneqarneq ajorpoq. Soorlu illoqarfimmut neriartortoqaraangat nerisassallu nammineq toqqassatillugit dagens ret-inik toqqaasoqarpiarneq ajortoq.