Palle assoralivoq

Imarsiornermik Ilinniarfiit illoqarfinnut allanut nuunneqassanngitsut, Naalakkersuisut ilinniartitsinermut periusissaat Inatsisartuni ippassaq eqqartorneqarmat taama isummersortoqarpoq.

Imarsiornermik Ilinniarfiit, Uummannamiittup Paamiuniittullu atuarfigineqarusunnginnerat pissutaalluni illoqarfinnut allanut nunneqartariaqartut, Ilinniartitaanermut Naalakkersuisoq, Palle Christiansen isumaqarpoq.

- Imarsiornermik Ilinniarfiup ingerlatiinnarnissaanut ajornartorsiutaapput, ilinniakkanut ilinniartitsisussaaleqinerit atuarfiullu avatigiisiisa naammaginannginneri. Piniartut Aalisartullu atuarfianni pisortaagallattoq qullersaavoq, taassuma ilinniartitsisut pitsaasut amigaatigai, ilinniartullu amerlagisassaanatik. Qulingiluat aallartipput, taakkuannga arfineq marluk ilaanni atuariartortarput marlullu takkutissanatik. Taamaattumik oqartoqarsinnaavoq atuarfimmi tassani ilinniartoqanngivissortoq, Ilinniartitaanermut Naalakkersuisoq, Palle Christiansen oqarpoq.

- Aamma taamaappoq Imarsiornermik Ilinniarfik Paamiuniittoq. Ilinniarfiup siulersuisuisa misissuineranni paasinarsivoq, Ilinniarfiup Paamiuni inissisimanera ilinniartitsisussaaleqqinermut pissutaanerpaasoq. Ilinniarfiit ilinniartitsisoqartariaqarput aamma sinerissami illoqarfiit ilaanni suliffissaqartitsiniaannarluta ilinniarfinnik inissiisassanngilagut, ilinniartitaanermut naalakkersuisoq oqarpoq.

Palle Christiansenilli taama tunngavilersuinera ikkappallaartoq, Siumut isumaqarpoq.

- Tupigusuutiginngitsuunngilarput Naalakkersuisunit oqariartortoqarmat, Paamiut illoqarfittut atorsinnaanngitsutut nalilerneqartoq. Imarsiornerup Paamiuni inissisimanerata takutippaa, misilittakkat annertuut aammalu sulisussaalatsitsinnginnermik inissisimasuupput qinnuteqartartullu amerlallutik. Taamaattumik illoqarfik narrugalugu illoqarfimmut allamut nuutsitsinermik oqalunneq isumaqataaffiginngilarput, Siumup siulittaasua, Aleqa Hammond oqarpoq.

Naalakkersuisooqatigiit partiiat, Inuit Ataqatigiit, Naalakkersuisup siunnersuutaannut aamma isumaqataanngilaq.

- Aalisarnermut Piniarnermullu ilinniarfiup sumiiffimmini ingerlaannarnissaa Inuit Ataqatigiinniit pingaaruteqartupilussuartut isigaarput, taassumalu nukittorsarneqarnissaa saneqqunneqarsinnaanngitsutut isigalutigu, Inuit Ataqatigiit Inatsisartuni oqaaseqartartuat, Hans Aronsen ippassaq saqqummiinermini ilaatigut taama oqarpoq ilanngullugulu oqaatigaa Imarsiornermik Ilinniarfik aamma Paamiuniiginnassasoq.

- Ilinniartut ilinniakkaminnik nukittorsarneqarnissaat ilinniakkaminnillu naammassinnittarnissaat anguneqassaaq, ilinniarfiit ataatsimuulersinneqarpata, taama Naalakkersuisut Ilinniartitsinermut periusissiaanni allassimavoq.

Ilanngullugu allappaat annertuumik ingerlatsinermi iluaqutissaqarnissamik periarfissiissoqassaaq, taamaalilluni ilinniartumut ataatsimut agguaqatigiissillugu aningaasartuutit ikilissallutik.