Palæstiinamiut Israelimit sallunaveeqqutitut tiguakkat 39-t iperagaasut
Palæstiinamiut Israelimit tigusarineqarsimasut maannamullu parnaarussaaqqasimasut 39-t sapaammi unnukkut iperagaasut, Israelimi parnaarussivinnik aqutsisoqarfiup uppernarsarpaa.
Tigummiakkanik Israelip islamisiortullu Hamasimeersut isumaqatigiissusiornerisigut paarlaasseqatigiittoqarpoq.
Iperagaasut qanoq utoqqaatiginersut ilisimatitsissutigineqanngilaq. Tigummiakkalli ullut kingulliit marluk ingerlaneranni iperagaasut tassaasimapput arnat inuusuttullu.
Israelimiut Hamasip sallunaveeqqutitut tigummiaasa akornanni 50-it, Hamasimit ullut kingulliit sisamat ingerlaneranni iperagaareersullu Palæstiinamiut Israelimit tigusarineqarsimasut 150-it iperagaapput.
Sallunaveeqqutit Hamasip tigummiaasa ilaat 13-it - taakkunannga meeqqat qulingiluat - sapaammi iperagaapput.
Thailandimiusut innuttaassusillit pingasut aamma iperagaapput, russisullu israelimiusullu innuttaassusilik ataaseq aamma iperagaalluni.
Hamasip sallunaveqqutitut tigummiaasa ilaannik iperagaasoqareernikkut Palæstiinamiunik parnaarussaaqqasunik, Israelip Hamasillu akornanni pingajussaa paarlaasseqatigiittoqarpoq.
Israelip Hamasillu akornanni ulluni sisamani sakkuaakkunnaarallarnissamik tallimanngormalli ullaakkut atuutilersitsisoqareersorlu tigummiakkanik paarlaasseqatigiittoqarpoq.