Lastbiilit ikiorsiissutissanik orsussamillu usisut Gazamut pajuttut

Lastbiilit pingasut ikiorsiissutissanik orsussamillu usisut Egyptenip Gazallu akornanni killeqarfikkoorlutik Gazamut pajupput. Israelip Hamasillu akornanni ulluni tulliuttuni sisamani sakkuaakkunnaarallartoqarnissaa atuutileqqammersorlu lastbiilit ikiorsiissutinik usillit isaapput.

Nutaarsiassaqartitsiviup Al Jazeerap tusagassiortuisa ilaat taama nalunaaruteqarpoq.

- Lastbiilit 230-t Gazamut pajuttuisinnaanissaat naatsorsuutigaarput, oqaaseqartartoq oqarpoq.

Israelip Hamasillu akornanni sakkuaakkunnaarallarnissamut isumaqatigiissut atuutilertoq, Al Jazeerap nalunaarutigaa, saassussisarnerillu unitsinneqartut oqaatigalugu:

- Ataatsimut isigalugu eqqissisimasoqartoq takusinnaavarput, timmisartummi Gazamik silaannakkut saassussisarnerit unikkiartuaarpoq, taanna nutaarsiassaqartitsivimmut oqarpoq.

Hamas Israelimiunik amerlasuunik sallunaveeqqutitut tigummiaqarpoq, taakkunanngalu 50-it iperagaanissaat, ullunilu sisamani sakkuaakkunnaarallartoqarnissaanik isumaqatigiissusiortoqartoq, Israelimi naalakkersuisut novembarip ulluisa 22-anni unnuaani nalunaarutigaat.

Palæstiinamiut Israelimit tigusat ilaasa iperagaanissaat isumaqatigiissutigineqartoq Hamasip kingorna aamma nalunaarutigaa.

Palæstiinamiut 39-t tallimanngornermi iperagaajumaartut, Israelimi atorfilittat ilaata oqaatigaa. Nutaarsiassaqartitsivik CNN taama allaaserisaqarpoq. Iperagaasussat tassaanerarneqarput niviarsiaqqat nukappiaqqallu 18-it inorlugit ukiullit.

Palæstiinamiut qaqugu iperagaassanersut suli ilisimaneqanngilaq. Hamasilli sallunaveeqqutitut tigummiagaat Israelimut utertinneqarlutik iperagaareerpata aatsaat Palæstiinamiut iperagaajumaartut, Israelimiut atorfilittaasa ilaat CNN-imut oqarpoq

Israelimi tallimanngornermi ullaakkut nalunaaqutaq arfineq-marlunngortoq sakkuaakkunaarallarnissamik isumaqatigiissut atuutilerpoq, tassa nunatta nalunaaqutaa naapertorlugu unnuaq nalunaaqutaq pingasunut.

Israelip Hamasillu akornanni sakkuaakkunnaarallarnissamik isumaqatigiissut ullut sisamat qaangiuppata atuukkunnaarpat, Hamasip sallunaveeqqutitut tigummiaasa akornanni qulit ullormut iperagaappata sakkuaakkunnaarallarnissamik isumaqatigiissut sivitsorneqarsinnaasoq, Israelip oqaatiginikuuaa.