Israel: Sallunaveeqqutitut tigusat tallimanngornermi aatsaat iperagaasinnaapput
Palæstiinamiut tigusarineqarsimasut, Hamasilluunniit sallunaveeqqutitut tigummiagaat tallimanngornermi aatsaat iperagaasinnaassapput.
Israelimi isumannaallisaanermut tunngasuni siunnersorti Tzachi Hanegbi, Israelimi ministeriunerup allattoqarfia sinnerlugu taama oqarpoq.
Sallunaveeqqutitut tigummiarneqartut siulliit sisamanngornermi iperagaanissaat aallaqqaammut ilimagineqaraluarpoq.
Israelip nunanut allanut tunngasunut ministeria Eli Cohen, Israelimi radioqarfiit ilaannit Israelimi illersornissaqarfimmit ingerlanneqartumi apersorneqarluni pingasunngornermi taama oqarpoq.
Hamasip sallunaveeqqutitut tigummiagaasa ilaat 50-it Gazami iperagaanissaat Israelip Hamasillu isumaqatigiissutiginikuuaat, Israelillu taarsiullugu Palæstiinamiut tigusarineqarsimasut maannalu parnaarussaaqqasut 150-it iperassavai.
Illuatungeriit ulluni sisamani sakkuaakkunnaarallarnissaannik taassuma saniatigut aamma isumaqatigiissutigineqarpoq.
Sallunaveeqqutitut Hamasimit tigummiarneqartut iperagaasussat 50-it saniatigut sallunaveeqqutitut tigummiarneqartut qulit iperagaappata sakkuaakkunnaarallarnissamik isumaqatigiissut ullumik ataatsimik sivitsorneqartassaaq.
Qaqugu sakkuaakkunnaarallartoqalissanersoq ilisimaneqanngilaq.
