Paggivittami sapusiassamut akerliussutsimik takutsisut arlallit tigusarineqartut
The Labrador Land Protectors, Paggivittap Nunataata Illersuisui, Paggivittami Churchillip kuussuani innaallagissiorfissuarmik sapusiornissamik suliniut, Muskrat Falls, unitsinniarlugu ukiorpassuarni ilungersuuteqarput.
Sapusiaq illoqarfiup Happy Valley-Goose Bayip kitaatungaani kilometerinik 25-inik ungasitsigisumi Churchillip kuussua atuarlugu sanaartorneqarpoq.
Sapusiortoqarneratigut kuussuup imia methyl kviksølvimik mingutsinneqassaaq, akuutissarlu taanna kuussuup imianik imertartunut tarnikkut timikkullu akornuteqalersitsisinnaavoq. Aamma aalisakkanut uumasunullu allanut akornutaasinnaavoq.
AAMMA ATUARUK Paggivittami utoqqaat pingasut erngup nukissiorfiliornermut akerliunertik pillugu parnaarussaasut
Paggivittap Nunataata Illersuisui Canadami inatsisartut illorsuata saavani ataasinngormat akerliussutsimik takutitsipput, aamma illorsuarmut iserniarsaripput Inuit allallu kuussuup imiata mingutsinneqartup kingunerinik eqqugaasussat assinginik inatsisartuni ilaasortanut tamanut tunniussiniarlutik. Paggivittap Nunataata Illersuisui isumaqarput imeq mingutsinneqartoq peqqissutsiminnut, inuussutissarsiutiminnut kulturiminnullu ajoqusiisinnaasoq.
Sapusiassap sanaartorneqarnera 2013-imi aallartippoq, kinguaattoorutigineqangaatsiaramilu aatsaat 2019-imi naammassineqarnissaa naatsorsuutigineqarluni.
AAMMA ATUARUK Muskrat Falls perulluliuutaaqqittoq
Sapusiaq 45 milliardit koruunit missaannik akeqassaaq.
Suliniutilli aallartinneqaranit aningaasaqarnikkut pissutsit allanngorsimapput sapusiarlu aningaasatigut iluanaarutaasinnaassanersoq ullumikkut nalunarluni.
Paggivittarmiulli sapusiornermik suliniutip unitsinneqarnissaa suli neriuutigaat.
