Paggivittami utoqqaat pingasut erngup nukissiorfiliornermut akerliunertik pillugu parnaarussaasut

Naggueqativut utoqqaat pingasut nunaminnik kulturiminnillu illersuiniarnertik pissutigalugu maannakkorpiaq parnaarussaaqqapput.
Paggivittami Muskrat Fallsimi erngup nukissiorfissuup sanaartorneqarnera Assi © : Government of Newfoundland and Labrador/Flickr Creative Commons
Allattoq Marianne Stenbæk, Montreal, Canada
aggustip 01-at 2017 11:20
Nutserisoq Simon Uldum -

Naggueqatigiit Inuit Labradorimi Muskrat Fallsimi erngup nukissiorfissuarmik sanaartortoqarnera sivisuumik akerliuffigaat.
Suliniutip annertuup affaa maannamut sanaartorneqareerpoq, nagguteqatittalu nunamik ilaanik qarsutsinissaa erngullu kviksølvimik akoqalernissaa pissutigalugu suliniut akerleraat. Aalisakkammi, uumasut inuillu toqunartunik eqqugaasinnaapput.

Utoqqaat pingasut aanaajusut aataarlu ataaseq, utoqqaanersaat 79-inik ukioqartoq, akerliunertik akerliussutsimillu takutitsinerit eqqartuussivikkoortumik inerteqqutigineqarnerannik atsiugaqarusunnginnertik pissutigalugu sapaatit akunnerata siuliani tigusarineqarput.

AAMMA ATUARUK Muskrat Falls perulluliuutaaqqittoq

Newfoundlandimi St. Johnsimi parnaarussivimmut kilometerinik 800-nik ungasitsigisumiittumut aallartitaapput.

Taakku eqqartuussivimmut sapaatip akunnerani uani sassartinneqartussaapput, sapaatillu akunnerani ataatsimi parnaarussivimmeereerlutik. Parnaarussivik inissinneqarfigisaat angutinut parnaarussiviuvoq.

Utoqqaallu oqarnerattut: Peqqissuserput, inuunerput kulturerpullu sorsuutigivagut.

Utoqqaat pingasuusut tapersersorlugit Labradorimi akerliussutsimik takutitsinerit maanna ingerlanneqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq