Muskrat Falls perulluliuutaaqqittoq
![](/sites/default/files/styles/image_934x467/public/article_images/muskrat_falls_labrador_emmaatlarge_flickr.jpg?itok=huZi7Def)
Nukissiorfiup eqqaani imeqarfiit, kuuit kuussuillu, taamatullu aamma aalisakkat uumasullu allat nukissiorfimmit mingutsinneqarsorineqarput.
Inuit, Innu-indianerit métisillu kattuffiat nukissiorfimmut akerliussutsimik takutitsisut Canadami naalakkersuisut isumaqatigiissuteqarfigisimavaat.
Sumiiffimmi naasut naasimasut kviksølvinnguutsitsisinnaasut piiarlugit saliisoqartussaagaluarpoq.
Tamannali suli pinngilaq.
Inuit, Innut Métisillu kattuffiata "nunamik illersuisutut" imminnut taagortut Goose Bayimi Happy Valleyimi naalakkersuisoqarfiit illutaasa silataanni sapaatit-akunnerata siuliani akerliussutsimik takutitsipput. Newfoundlandimi naalakkersuisut siulittaasuat Dwight Ball tunuaqquaat Muskrat Fallsimilu saliisoqaannarani nukissiorfiup matuneqarnissaa piumasaralugu.
Nunamik illersuisunik imminnut taagortut arlallit politiinit tigusarineqarsimapput, taamaakkaluartoq akerliussutsimik takutitsinerit sapaatit-akunneranni uani nangeqqinneqassasut oqaatigineqarpoq.