Paamiormiut saammarsaaserpaat
Naalakkersuisut taama aalajangiisinnaassuseqarnerat eqqarsaatigalugu, Asii Chemnitz Narup maanna suleqatiserinnippoq, Paamiuni ukiuni kingullerni qulini inuerukkiartuinnalersimasumut ineriartortitsinissamut periarfissanik ujartuinissamut suleqatiserinnilluni.
- Naalakkersuisut aalajangernerat, taanna Naalakkersuisut aalajangersinnaatitaanerisa iluaniimmat tusaatissatut tigoriarlugu isumaqarpugut massakkut soqutiginartua Kommuneqarfik Sermersuumut uaniilersoq: Illutatigut allatigullu taqqavani periarfissat siunertanut allanut sunut atorneqarsinnaappat? Kommuneqarfik Sermersuumi borgmesteri Asii Chemnitz Narup oqarpoq.
Imarsiornermut Ilinniarfiup initai inerisimassutsimikkut kinguarsimasunut sullissivinngorsinnaanissaat, Ilinniartitaanermut naalakkersuisup Palle Christiansenip periarfissatut isigaa.
- Paamiuni ilinniartunut inissiat blokit marluk ilinniarfiullu initai nutarsassavavut, inerisimassutsimikkut kinguarsimasut taamaalilluta atuarfissaqartilerniassagatsigit. Inerisimassutsimikkut kinguarsimasut siusinaartumik ullumikkut pensionisiaqartinneqalertarput, nalunngilarpulli piorsarneqarsinnaasunik ilaqartut, namminerlu tunniussaqarsinnaasunik, taakkuuppullu ilinniartissinnaasassavut, Palle Christiansen oqarpoq.
Naak Imarsiornermik Ilinniarfiuåp matuneqarluni Nuummut nuunneqarnissaa ajuusaarutigigaluarlugu, innarluutillit pitsaanerusumik sullinneqarsinnaalernissaat pillugu Naalakkersuisut suleqatigalugit periarfissarsiornissamut Asii Chemnitz Narup ammavoq.
- Ilinniartitaanermut periusissaq pillugu Naalakkersuisut tusarniaammata uparuaanikuuvugut innarluutilittatsinnut ilinniarfissamik titarninnguamilluunniit ataatsimik ilanngussinikuunngimmata. Inuusuttunnguaqarpoq innarluutilinnik, taakkua piginnaasatik atorlugit ilinniaqqinnissaannut aamma periarfissanik massakkut aqqutissiuisariaqalerpugut. Tassunga siunertamut Paamiut piukkunnartorujuupput, Kommuneqarfik Sermersuumi borgmesteri Asii Chemnitz Narup oqarpoq.
