Ove Karl: Aleqa tunngavilersuutissaaleqivoq
Taama pisuutitsineq aatsitassanut Naalakkersuisup Ove Karl Berthelsenip nuannarinngilaa.
Taanna allappoq, piffissami matumani sammisaq pillugu sapaatit akunneri tamarluinnaasa allaaserisanik, radiukkut tv-kkullu ilanngussanik imaluunniit tamanna pillugu oqaaseqaatinik saqqummertoqartuartoq. Aamma ingerlatassanut angisuunut atatillugu innuttaasunik ataatsimiititsisoqartarlunilu ataatsimiititsisoqartarniartoq oqaatigalugu.
Taamatuttaaq aatsitassarsiornermi pilersaarutit pillugit innuttaasut annertunerusumik paasisaqarnissaminnut piaartumik periarfissinneqassapput, piffissami qaninnerusumi aatsitassarsiornermi pilersaarutit pillugit KNR suleqatigalugu aallakaatitassianik arlaqartunik aallakaatitsisoqartartussaammat.
Ove Karl Berthelsen allappoq, Aleqa Hammondip saassusseqattaarnera nammineerluni qineqqusaarnerminut aallartitsereersimaneranut ersiutaaginnartoq.
- Aatsitassarsiornermik sammisaqarnermi politikkikkut ukiut qulit sinnerlugit isumaqatigiittarneq kipineqarpoq, Ove Karl Berthelsen allappoq, oqaatigalugulu Nunatta aatsitassarsiorfiusutut ineriartortinnissaanut - taamaalillunilu Kalaallit Nunaata siunissaanut tamanna pitsaanngitsoq.
- Tamanna uggornarpoq, taamaattorli suliarput upperaarput, Ove Karl Berthelsen naggasiivoq.
Aatsitassarsiornermi pilersaarutit pillugit KNR-TV-kkut paasissutissiineq siulleq unnugu arfineq-pingasut qaangerlugit tanneq tallimanut, 20.25, aallakaatinneqassaaq. Aatsitassat qanoq atorluarneqarsinnaanerat pillugu Naalakkersuisut aalajangernerannut tunuliaqutit tassani qaammarsarneqassapput.
