Ottawami Isumaqatigiissut Demokraatit allanngortikkusuppaat
Ottawami Isumaqatigiissut tassaavoq Issittumi Siunnersuisooqatigiit tunngavilerneqarnerini nunat issittormiut arfineq pingasut 1996-imi isumaqatigiissutigisaat. Nunat tamarmik immikkut ataatsimik siunnersuisooqatigiinni issiatitaqarnissaat tassani naqissuserneqarpoq. Tassa imaappoq Kunngeqarfik Danmark ataatsimik issiatitaqassasoq.
Palle Christiansenip Demokraatineersup tamanna allanngortikkusuppaa. Taassuma siunnersuutigaa Ministerit tulliani ataatsimiilerpata Isumaqatigiissutip allanngortinneqarnissaanik Naalakkersuisut siunnersuuteqassasut.
- Allannguuteqartitsinikkut nunat namminersorfiusut tamarmik tamakkiisumik oqaaseqarsinnaatitaallutillu taaseqataasinnaallutik isumaqatiginninniarnerni issiatitaqarnissaat qulakkeerneqassaaq. Allatut iliorneq pissusissamisoornavianngilaq, aamma Ottawami Isumaqatigiissutip 1996-imi pilersinneqarneranit politikkikkut ineriartornermut tulluukkunnanngilaq, tusagassiorfinnut nalunaaruteqarluni taama allappoq.
Nunat namminersorfiusut 1996-imiilli annertuumik ineriartorfiusimaneri tunngavilersuutigaa, taamaammat Palle Christiansen isumaqarpoq Issittummi Siunnersuisooqatigiit katitigaanerisa allanngortinnissaanut piffissanngortoq.
Kalaallit Nunaat Issittumi Siunnersuisooqatigiinni taaseqataasinnaalernissaa kissaatigalugu Aleqa Hammondip Oqalliffimmi eqqaavaa, aammalu Danmarkip taaseqataasinnaanerminik Kalaallit Nunaannut tunniussisinnaanera periarfissaanerarlugu. Tamanna danskit nunanut allanut ministeriaqarfiata oqaaseqarfigerusussimanngilaa, Canadamiut siulittaasuutitaqartuusut isumaqatigiinniarfiginerisigut aaqqiissutissamik ujartuisoqaqqaarnissaa kissaatigineqarmat.
