Ornittagaq oqoqartoq
Kalaallit Illuutaat nittartakkamini taama paasissutissiivoq.
”Qiperoq” kalaallinut inooqataanikkut ajornartorsiortunut sammisassaqartitsiviullunilu attaveqaqatigiittarfiuvoq, sannavinni assigiinngitsuni aamma suliaqartoqarsinnaalluni.
”Qiperoq” ukiuni marlunni Christianshavnimi Langebrogade 6G ininik attartugaqarpoq. Ininili oqoqarnerata paasineqarneratigut atuisunit atoqqusaajunnaarpoq, Kalaallit Illuutaat taama paasissutissiivoq.
- Init piffissami sivisunerusumi isersimaffiginissaat illersorneqarsinnaanngilaq, Københavnimi Kalaallit Illuutaanni pisortaq, Leise Johnsen, taama oqarpoq.
Inuit 15-it missaat "Qiperoq"-mik ulluinnarni atuisuupput, inuillu allat sapaatit akunnerannut marlussoriarlutik aamma atuisuusarlutik.
Qiperormik atuisut ataavartumik aaqqiissuteqartoqarnissaata tungaanut Løvstrædemi Kalaallit Illuutaanni naqqup iluani inini ulluinnarni nal. 10-mit 16-imut naapissinnaapput, kalaallit Illuutaat taama paasissutissiivoq.
