Organisti sølviusumik nersornaaserneqartoq

Qasigiannguarmiu Ole Madsen sølvisumik Inatsisartut suliutaasuannit ataasinngormat nersornaaserneqarpoq.

Inatsisartut Siulittaasoqarfiat tusagassiorfinnut taama nalunaarpoq.

Ole Madsen Qasigiannguani peqatigiiffigilerinermi assigiinngitsorpassuartigut ukiorpassuarni kajumissutsumik suliaqartarnera sølviusumik nersornaaserneranut pissutaasoq, Mimi Karlsenip oqaatigaa.

- Najukkami inuiaqatigiinnut tunniusimallutit peqataajuarnikkut illoqarfiup inuuneranut katattussaanngitsumik tunniussaqarsimavutit timersoqatigiiffeqarnermilu timitalimmik suliniuteqartarnikkut timersornermi peqataassagaanni ataatsimoornerup ataqqeqatigiinnerullu pingaaruteqassusiinik ilinniartissimallugit, Mimi Karlsen ilaatigut oqarpoq.

Ole Madsen ulluinnarni sulinermi kajumissutsimillu suliaqarnermi saniatigut ajoqitut aamma ilinniagaqarsimasoq, taassuma aamma erseqqissaatigaa.

Ilungersuuteqallaqqissuusoq

Ole Madsen ukiorpassuarni organistiullunilu ajoqiusoq aamma ilungersuuteqallaqqissuusoq, Mimi Karlsenip oqalugiarnermini aamma erseqqissarpaa. 

- Oqaluffimmi pattattartutut ajoqitullu ukiorpassuarni atuussimavutit, maannalu utoqqaligaluarlutit suli taamatut sulillutit.

- Nutaarsiassaagunanngilaq oqaruma soraarninngorlutit suliarisartakkannit tunuarsinnaagaluarlutit inuiaqatigiinnut inooqataaffigisannik suli sullissinissat toqqarsimagakku, tamannalu inummut ilungersuuteqallaqqissumut ilisarnaatit ilagaat, Mimi Karlsen aamma oqarpoq.

Ole Madsenip akuuffigisimasai peqataaffigisimasaalu amerlaqalutillu assigiinngeqisut tamarmillu nersornaaserneqarnerani nalliuttorsiualaarnermi taaneqarsinnaagunanngitsut taamaammallu sølviusumik nersornaaserneqarnera inissaminiittoq, Mimi Karlsen naggasiivoq.

Nersornaaserneqartoq aamma oqalugiarami ilaatigut ima oqarpoq:

- Inuunermi inuttut suleqataasussanngorluta inunngortitaasimavugut. Uagulli nammineq aalajangertussaavarput taamaaliussanerluta taamaaliussannginnerlutaluunniit.