Oqarasuaatit angallattakkat meeqqat atuakkanik atorniartarfianni atorneqaqqusaajunnaassasut
iPadit, mobilit, tabletit qarasaasiallu Nuummi meeqqanut atuagaateqarfimmi atuarusunnermik isumaliutiginneqqissaarnissamillu inissaqartitsinermik taarserneqassapput.
Taakku tusagassiuutinut nalunaarummi allapput.
Qarasaasiat assigisaallu initungaatsiarnerat pissutaavoq, meeqqallu aggertartut amerlanerpaartaat atuagaateqarfik internettimik akeqanngitsumik atuillutik spillerfigalugulu Youtuberfigiartortarpaat.
- Ilaatigut ilaqutariit mikisunik meerallit aggeraluarlutik eqqissisimaarfiunngitsoq malugigaangamikku aneqqiinnartartut siumortarpagut, atuagaateqarfiup pisortaa, Elise Petersen tusagassiuutinut nalunaarummi oqarpoq.
Taassuma atugaateqarfik atuakkamik atuarniarnermik ajornakusoortitsisoqartarnera pissutigalugu qoqernaveeqqutinik atugassaateqarnersoq aperineqakulasoq oqaatigaa.
- Atuagaateqarfimmi atuarsinnaanngikkaanni taava ajortoqarpoq, atuarusulersitsinissamik siuarsaanissamut atuarnermillu kultureqalersitsinissamut iliuuseqartariaqarpugut, taanna oqarpoq.
Nakuuserneq imminullu innarliineq
Meeqqat tallimanit 17-inut ukiullit mobilinik assigisaanillu sunngiffimminni akunnernik marlunnik sivisunerusumik atuinnginnissaat danskit 2024-imi innersuussuteqarnerat suliniummi tunngavigineqarpoq.
Meeqqalli isiginnaagaat inersimasunik nakkutigineqaratik akunnerpassuarni atuagaateqarfimmiittartut atugaateqarfimmi sulisut maluginiarsimagaat, tusagassiuutinut nalunaarummi allapput.
Paarisap, PiSiup Kalaallit Nunaanni Politiillu nunatsinni meeqqat akornanni nakuusernernik videolianik ingerlatitseqqiisoqartarnera inoqatinullu attaveqaqatigiiffitsigut imminnut innarlernissamut kaammattuisoqartarnera mianersoqqussutiginikuuaat.
- Angajoqqaat meeqqatik internetimik atuinissamut sinaakkusersuilluarnissaannik ikiussagaat Paarisap PiSiullu innersuussutigivaat, aamma meeqqat maani kisimiillutik taamaaliunnginnissaat taperserparput, Elisa Petersen oqarpoq.
Mobilinik assigisaanillu atueqqusaajunnaarneq inersimasunut meeqqatik igalugit atuagaateqarfimmiittunut aamma atuuppoq. Taamaammat inersimasut meeqqat ilagalugit atuagaateqarfimmiittut mobilertik qaqeqqusaassanngilaat.
Malittarisassaq septembarip aappaani atuutilissaaq, malittarisassarlu allanik marlunnik aamma malittarisassamik ilaqarpoq. Tassa meeqqat 4. klassinit nukarliusut inersimasumik ilaqartassapput, paaqqutarinniffiillu kikkut tamarmik inissaqartinneqarnissaat pissutigalugu aggernissartik sioqqullugu nalunaaruteqareertassapput.
