Oqaluttuatoqaatitsinnut kulturitsinnullu tunngasunik meeqqanut Ilisimatusarfimmi atuakkiortoqassasoq
- Meeqqat atuagaannik, inuit kingornussaannik nalitsinnilu meeqqanut atassuteqalersitsisunik, allakkusuppunga.
Meeqqanut atuakkiortoq nunatsinni ilisimaneqarluartoq Ikimalik Pikilak taama oqarpoq. Taanna kulturitsinnut tunngasunik meeqqanut Ilisimatusarfimmi ukiuni tulliuttuni marlunni atuakkiorniarpoq.
Kulturitsinnut tunngasunik meeqqanut atuakkiaqareerpoq, nunatsinnili inuit ilarpassuisa peroriartornerminni meeqqanut atuakkat ungasissumi najugalinnit allanneqarsimasut atuagarisarsimavaat. Meeqqqanut atuakkiortoq tusagassiorfinnut nalunaarummi taama issuarneqarpoq.
Tamatuminngali allanngortitsinissamut - aningaasaateqarfiup Velux Fondenip tapiissuteqarfigisaanik – ukiuni marlunni suliniuteqartussanngornermigut periarfissaqalerpoq.
- Oqaluttuat kinguaariit akornanni attaveqatigiilersitsinermik aamma meeqqat kinaassusaannik nagguiinillu paasisaqartitsisinnaasutut immikkuullarissumik piginnaasaqartut aamma isumaqarpunga.
Atuakkiariniagai naggueqatigiit inunnut nutaaliortumik sammiviliititsissasut
Ikimalik Pikilak atuakkiaminik ‘Talloqut - a story from West Greenland’-imik aamma ‘Pivik learns from Takannaaluk'-mik saqqummersitsereernikuuvoq. Meeqqanulli atuakkiaareersuni suli ilaatinneqanngitsunik, tassa naggueqatigiit inunnut nutaaliortumik sammiviliititsisussanik suliniuteqarnermini nutaanik tallimanik meeqqanut atuakkiorniarpoq.
Tassa Ikimalik Pikilak meeqqanut tunniusimatitsisussanik isumassarsisitsisussanillu naggueqatigiit inuit kulturiannut, avatangiisaannut naleqartitaannullu tunngasunik imalinnik atuakkiornissi siunniuppaa.
Najoqqutassanik ilisimatusarniartoq
Meeqqanut atuakkiortoq atuakkiornermik ukiuni tulliuttuni marlunni suliniuteqarnermini Ilisimatusarfiup oqaasilerinermut, atuakkilerinermut tusagassiuutilerinermullu immikkoortortaani aamma inuiaat kulturiannut oqaluttuarisaanerannullu immikkoortortaani sulissaaq. Tamatumunngalu atatillugu inuit oqaluttuaataannut allanneqarsimasunut oqaluttuaatigineqartunullu najoqqutarineqartut paasisaqarfigineruniarlugit ilaatigut ilinniartut peqataaffigisaannik workshoppertitsinerni ilisimatusarnernilu peqataasassaaq.
Velux Fondenip Ikimalik Pikilaap saniatigut atuakkiortut allat nunami allamiuusut arfineq-marluk aamma tapiiffigai, taakkualu soorlu Savalimmiuni Danmarkimilu ilisimatusarfiit ilaanni ukiuni tulliuttuni marlunni aamma atuakkiussapput.
