Oqaluttuarisaanermit erlinnartuutit nittartakkami nutaami takuneqarsinnaalersut
![](/sites/default/files/styles/image_934x467/public/article_images/qangagooq_screendump_0.png?itok=HNHrLhfU)
Tassami nunatta katersugaasiviata allagaateqarfiatalu oqaluttuarisaanermit assit allagaatillu erlinnartut nittartakkami nutaami Qangagooq.gl-imi takuneqarsinnaalersippai.
Nittartakkami assit 18.000-t takusineqarsinnaalerput taakkunanilu nunatsinni assiliisartut siullersaata, John Møllerip 1890-imit 1922-mut assilisai 3000-t aamma nassaassaapput.
Innuttaasoqassutsit misissorneqarsinnaalersut
Assit saniatigut nunatsinni politikkikkut oqartussaaqataaffinni, qinigaaffinnilu siullerni aaqqissuussinerni, tassa Paarsisut kommunerådillu 1860-ip missaaniit 1939-p tungaanut allagaataat aamma nassaassaapput.
Piffissami 1790-imiit ukiut 100-t ingerlaneranni qassit nunatta avannaani najugaqarsimanersut aamma misissorneqarsinnaavoq.
Ukioq 1919 ujaraanni palasip siulliup, Christian Rosingip Tasiilamiinnermini ullormut allagarisartagai ilaatigut nassaarineqarsinnaapput.
Ukiut hunnorujoqqissaaq matuma siorna, januaarip 27-at, 1919-mi Tasiilami sila qatsorsimasoq ullup qeqqatalu missaani apisimasoq palasi ilaatigut allappoq. Aammattaaq niuertoq ulapissimavoq amerlasuummi kangerlummiit niuerniarlutik tikissimapput.
Qangagooq.gl-imi paasissutissat takusassallu saqqummersinneqartut ukiorpassuit ingerlanerini Nunatta Katersugaasiviani Allagaateqarfianilu nalunaarsueriaatsit, digitaliseriinermilu periutsit suliniutillu iluaqutigalugit piviusunngortinneqartut, nunatta katersugaasivia allagaateqarfialu allappoq.