Partiimut allanut nuuttoq: Oqaluttuarisaanermi uangaannaanngilaq
Henrik Fleischerimi qinigaaffimmi matumani siulliulluni partiimut allamut ilaasortanngorpoq. Tamanna Henrik Fleischerip KNR-imut uppernarsarpaa. Inatsisartut inissitsiterfiusumik ataatsimiinnerannit ullualunnguit qaangiuttut taama pisoqarpoq.
- Ullaaq manna tamanna pivoq. Siumumut ilaasortanngorpunga, Henrik Fleischer marlunngornermi oqarpoq.
Taamaalilluni Partii Naleqqap Inatsisartunut ilaasortaatitai sivikitsuinnarmik sisamaapput, qinersinerullu siulianitulli pingasunik ilaasortaatitaqalerluni.
Henrik Fleischer 143-nit taaguunneqarpoq, pingaartumillu parteerisimasami siulittaasuanut, Hans Enoksenimut taaguussinerit 2.500-nit amerlanerulaartut pissutaallutik Inatsisartunut ilaasortanngorluni.
Taamaakkaluartoq Inatsisartut inissinnerannit sapaatit akunnera qaangiutinngitsoq Partii Naleqqamit ilaasortaajunnaariarluni Siumumut ilaasortanngorpoq.
- Soorunami inuiaqatigiinnut kusananngikkaluarpoq, Henrik Fleischer oqarpoq, nangillunilu.
- Kisianni oqaluttuarisaanermi uangaannaanngilaq, taama iliornikoq. Aamma inatsisinik unioqqutitaqanngilanga.
Henrik Fleischer politikkikkut sulinermini ingerlaqqittariaqartutut misigisimavoq.
AAMMA ATUARUK Henrik Fleischer Siumumut nuuttoq
Partiimilu annerusumi sulilluarnerusinnaassalluni isumaqarpoq.
- Soorlu Partii Naleqqami siulittaasorisimasama oqaatigisaraa, suliniarneq partiiarannguamiilluni assut ilungersunartarpoq, assullu imaannaanngittarluni. Partiiarannguaq taanna ukiorpassuit ingerlanikuunngilaq, taamaammat inississornini aamma inerisarusaarnini ingerlappaa, Henrik Fleischer oqarpoq.
AAMMA ATUARUK Fleischer ingasaassivoq
Sooq Siumut sinnerlugu qineqqusaaginnarsimannginnersoq aperineqarami Henrik Fleischer ima akivoq.
- Pisut piartuaarnerini aalajangeriartuaarnera arriitsumik ingerlarusaarsimavoq. Uggornaraluartumillu piffissaa nuanninnginnerpaaffianiikkaluarluni taama aalajangertariaqalerneq allatut ajornarsimavoq, Henrik Fleischer oqarpoq.
AAMMA ATUARUK Henrik Fleischer Partii Naleqqamit tunuartoq
